Lokal | 16. juni 2016
Oppdrettsutstyr sto i full fyr
Det var opne flammar og mykje røyk då noko plast tok fyr på Amundsneset torsdag formiddag.
Kjetil Vasby Bruarøytorsdag 16. juni 2016 12:23
Torsdag klokka 11.20 fekk Os brannvesen melding om brann på Amundsneset på Sundøy.
– Det var opne flammar og mykje røyk, men det gjekk raskt å sløkka, fortel varabrannsjef Arne Monsen.
Brannen var på nordaustsida av neset, vis a vis Hargun-naustet. Det skal vera eit oppdrettsfirma som leiger plassen, og utstyret deira som hadde tatt fyr.
– Om brannen hadde fått utvikla seg kunne den spreidd seg til det tidlegare Garvik Sjøhus.
Kan ha vore elektrisk feil
Politiet er på staden og årsaka til brannen er førebels ikkje funnen.
Men det skal ha gått ein elektrisk leidning ved utstyret som brann.
Ein nabo skal og ha fortalt at jordfeilbrytaren hans ofte har slått seg ut i det siste.