Opnar snart igjen
Ein konkurs i morselskapet har gjort at lekebutikken på Amfi Os har vore stengd siste veka. – Det ser ut til at dei kan opne igjen før helga, seier Anne Kristine Tøsdal.
Fredag i førre veke gjekk porten ned for leikebutikken på Amfi Os. På gitteret heng lappar om at butikken er midlertidig stengd.
– Bakgrunnen er ein konkurs i Diddy Toys AS som eigde denne butikken og ein på Kleppestø.
– Selskapet gjort for eit par år sidan ei satsing på austlandet som ikkje gjekk, og har etter det slitt med gamal gjeld som no gjorde at dei gjekk konkurs, forklarar senterleiar, Anne Kristine Tøsdal.
Har gått godt
Sjølv om butikken på Os har gått særs godt heile vegen, måtte dei altså stengje dørene sist fredag.
– Eg blei litt overraska då meldinga om konkursen kom.
– Butikken her på senteret har gått bra heile tida. Dei har vakse jamt og trutt i omsetning heile vegen og leverar overskot.
– Du veit, vi bur i ei vekstkommune med mange barnefamiliar, så ein leikebutikk er det grunnlag for.
– Ein konkurs medfører jo alltid mykje arbeid, men no ser det ut som om saka er i ferd med å løysa seg. Forhåpentlegvis kan porten gå oppatt i løpet av dagen, avslutter senterleiaren.