Opnar renseri-teneste

Renseriet AS, som overtok og dreiv renseri i Brugata fram til dei blei lagt ned for nokre år sidan, er tilbake i Os med ny teneste.

– På stadar som har for lite volum til at vi kan forsvara å ha eige renseri, men som likevel har ein god marknad, opprettar vi gjerne slike satellittar, seier Trond Eikemo frå Renseriet, ein kjede som har drive med renseri på Vestlandet i rundt 90 år.

Før helga gjorde han avtale med damemotebutikken Baronessen i Os sentrum.

– Vi såg etter ein tekstilbutikk med erfarne tilsette og god personleg service og er glad for at vi har fått kommisjpnæravtale med Baronessen.

På Baronessen kan du no levera, henta og betala for rens av klede og annan tekstil, medan det du leverer inn blir rensa anten på Lagunen eller Åsane Storsenter.

– Eit kjekt tilleggstilbod

Marit Næss og Astrid Breivik fortel at dei synast det var overraskande og kjekt å få tilbod om å bli kommisjonær for Renseriet.

– Vi ser ikkje på dette som meirarbeid, det skal berre bli kjekt med litt auka trafikk langs Baronselva, seier Marit.

– Eg renseri veit eg at mange har sakna, så eg trur det er eit attraktivt tilbod som no kjem tilbake til Os.

Startar med to hentedagar

I starten kjem Renseriet til å ha faste hente- og leveringsdagar tysdagar og fredagar i Os.

Blir det eit stort volum så blir det også fleire dagar med henting og levering.

– Damene hos Baronessen kan allereie mykje om tekstil, men vil få litt opplæring om dette med rensetenesten.

– Dessutan ser vi over alt vi hentar og ringer kunden om vi er i stuss ved noko av det som er levert inn, om det lét seg rensa, om noko må takast av plagget eller liknande, seier Eikemo.