Opna terapisenter
Os Fysikalske har blitt til Os Manuellterapi og Fysioterapi, og flytta inn i lokalet dei nærmast på spøk gjekk for å sjå på for eit år sidan.
Bildeserie:
- Det var som ein vits den gong, både med storleiken og prisen, men etterpå sette vi opp nokre budsjett, og i vår slo vi til, fortel Hege Bøe om då dei var på vising i etasjen over Visningssenteret i Hamnevegen.
Etter ein travel sommar med innreiing av lokalet inviterte dei fire terapeutane i går til opning og framsyning av dei nye fasilitetane.
Ny, men eldst
Os Fysikalske Institutt er det eldste fysioterapi-instituttet i Os, starta i 1966 av eldsjela Elna Merok Lindtner.
- Elna jobba som fysioterapet frå 1961 til ho var over 70 år, eg jobba saman med ho frå 1972, fortel Hege.
Fleire terapeutar har vore aktive ved kontoret, men då Elna gav seg ville Hege ha inn ein ung terapeut. Ho fekk selskap av Siv Hagevik, og seinare Svein-Erik Henne, som i tillegg til å vera fysioterapeut er manuellterapeut.
Saman har dei gjort ANS-et om til aksjeselskap, med det nye namnet Os Manuellterapi og Fysioterapi AS.
Lene S. Ringeling er også del av instituttfellesskapet, som leigetakar og samarbeidspartnar.
Vindu mot Os
Etter mange år i Landboden kom dei fire terapeutane seg i sommar i drift i dei nye lokala.
Her er eigen entré, lunsjrom og kontor, to disponible rom i tillegg til fire behandlingsrom, garderobar og eigen treningssal.
- No kan pasientane våre koma oppom og driva eigentrening om dei vil. Vi har også ein timeplan med gruppetrening, blant anna trening for gravide, trening av rygg, fysio-pilates og bassengtrening. Til trening i vatn brukar vi Luranetunet sitt basseng, fortel Svein-Erik Henne.
Han er svært nøgd med å vera på plass i nytt lokale, både storleiken, innhaldet og utsikta.
- Grensa går vel rett her nede, så vi ser både elv og sjø, seier han med eit smil.
Holdingselskapet deira eig lokalet, og har fått det passande namnet "Vindu mot Os AS".