Omringa av ungdom frå Askøy
NytræRX tok imot «Mekkeriet». – Vi må ta vare på dei som har interesse for motor, det er eit lite miljø, seier Jarle Nytræ.
Bildeserie:
Rallycrossteamet NytræRX, eit av tre team i CircleX, opna i helga dørene for Mekkeriet frå Askøy.
– Mekkeriet er eit gratistilbod for ungdom frå 13 til 25 år. Frivillige har bygd ein verkstad der ungdomen kan samlast for å skru på alt frå moped og bil til sykkel og påhengsmotorar, ein arena for uformell læring, kurs, erfaringsutveksling og sosialt samvær, seier styreleiar Kim Reidar Åsebø.
Han stilte saman med andre leiarar og åtte ungdomar i Hegglandsdalen for å sjå nærmare på fasilitetane og bilane til den i regionen som driv på høgast nivå, rallycrosskøyrar Jarle Nytræ.
– Eg synest bere det er gøy at dagens ungdom er interessert i motor. Om vi kan vera med på å ta vare på desse, og kanskje få endå fleire interessert, så er det stas, seier Jarle.
• Les òg: Fullførte semifinalen med tre hjul
– Då eg var ung så skrudde alle på alt. Dei fleste hadde verktøy og kunnskap sjølv, og alle hjelpte kvarandre. Mekkeriet ser ut til å vera eit veldig flott tilbod.
Takksam ungdom vil sjølv bygga bil
Team NytræRX stilte med fullt mannskap, ryddig garasje, fyr i grillen og ferdigdekka langbord. I garasjen er ulike bilar, også ramma til ein tidlegare EM-vinnar, ein bil som skal byggast.
– Dette er både inspirerande og lærerikt! På Mekkeriet har vi ein bilcross-bil som vi held på med å bygga, derfor er det ekstra kjekt å koma på besøk, seier Åsebø.
Mekkeriet søkjer noe etter fleire leiarar for å utvida tilbodet frå éin til to kveldar i veka.
• Les meir om tiltaket på Mekkeriet.com
Ungdomane gjekk frå bil til bil for å sjå nærmare på både interiør og motor.
– Vi liker oss på Mekkeriet. Tidlegare så skrudde eg litt på sykkel hos onkelen min, no kan vi vera fleire saman, ha tilgang på mykje verktøy, skru på våre eigne ting, og samtidig få hjelp av både kvarandre og av vaksne mekanikarar, seier ein av dei åtte ungdomane.
Lag-arbeid
Etter omvising på verkstaden fekk dei sjå korleis NytræRX bur når laget er på tur, på innsia av den eine lastebilen.
– Det er sosialt, men det er også travelt. Alle har sine funksjonar, og alle i teamet er like viktige, forklarte Nytræ.
Når teamet er på tur er det så hektisk at det blir vanskeleg å setja av tid til måltid.
– Vi har ikkje ledige folk til å henta takeaway ein gong, men no er vi heldige og har med oss eigen kokk.
Også laurdag var det kokk på plass. Men før hamburgarane blei serverte blei rallycrossbilen trilla ut av garasjen for i visa gjestane litt av kva den er god for.
• Midtsiden samleside: Motorsport