Om bord hos Tom Ole

Bildeserie:

Full skjerm

1 av 19

Måndag i førre veke var «Kristine Bonnevie» innom Os hamn. Årsaka var at forskarane trengte ei kule til kalibrering av noko utstyr som dei skulle testa i Bjørnafjorden.

Fleire osingar jobbar for Havforkningsinstituttet, både i land og på båt, som Kalle Bratholmen, som etter 48 år på sjøen no i jula har sin siste tur før han pensjonerer seg.

Skipper om bord er Tom Ole Drange, også han byrja å reisa då han var 19 år.

– Eg byrja på eldste «Dr. Fridjof Nansen» i 1984. Det kom eit avbrekk med militæteneste, men eg var på sjøen igjen etter nokre år og fekk blant anna med meg independence day i Namibia i mars 1990, fortel Tom Ole.

I 1995 tok han vidare utdanning, i 2003 var han skipper for første gong, då på «Johan Hjort».

Nøgd med tur og turnus

– Det var spennande å segla langs Afrika og i Karibia, men eg trivst òg godt langs norskekysten, seier Drange, som fekk 10 år som matros, mange av dei i utlandet.

– Vi får sett mykje av kysten vår, både hav og djupe fjordar, og av Svalbard, der vi ofte reise sommarstid.

– Fiskeflåten har ikkje freista?

– Det er nok meir pengar å tena innan fiske, men det har sine fordelar å jobba for forskinga òg. Fast turnus er ein av dei, du veit kor tid du har fri og kor tid du skal på jobb igjen.

Med éin månad på og éin månad av blir det også lett å halda styr på.

Mannskap, forskarar og studentar

Etter at ny «Dr Fridtjof Nansen» blei bygd kom den gamle inn og erstatta «Håkon Mosby», men med namnet «Kristine Bonnevie».

Men først blei skuta rusta opp for over 40 millionar kroner. Dåpen var i november 2016.

Dette skriv Havforskningsinstituttet om båten: «Etter fem månadar på verft i Måløy, er forskingsskipet kraftig oppgradert. No framstår skipet meir likt forskingsskipa «G.O. Sars» og «Johan Hjort» som er bygt på same verft. «Kristine Bonnevie» kan imidlertid skilta med eit splitter nytt EK 80, som er neste generasjons ekkolodd og går på breiband.I tillegg er båten utstyrt med naudsynte vinsjar, kranar og anna utstyr som trengs under forskingstokta.»

– Det har blitt ein heilt ny båt. Men det er òg gjort nokre enklare tilpassingar. Det er litt kaldare her oppe enn i Afrika, der den gjekk før, seier Drange, og peiker på ein liten vifteomn som står på golvet.

Mannskapet om bord består blant anna av folk som jobba på båten då den heitte Fridtjof Nansen, men fleire har gjort som Drange, søkt seg over frå Håkon Mosby, som no er fasa ut.

– Vi har mannskap på 14, men har i tillegg plass til 18 forskarar. Ofte har vi studentar med oss, og det er eit godt miljø mellom mannskap og forskarar, unge og eldre, synest Drange.

Då dei var i Bjørnafjorden testa dei ut både trål og avansert ekkoloddutstyr - i tillegg tok dei vassprøvar på ulike djupner.

Om «Kristine Bonnevie»
Førre namn: Dr Fridtjof Nansen
Bygd ved Flekkefjord Slipp og Maskinfabrikk i 1993.
Lengde: 56,75 m
Breidde: 12,5 m
Tonnasje: 1444 brt
Besetnad: 33 (av desse; mannskap på 14 personar)
Maskineri: 2.717 Bhp diesel