O-jubel på Kyrkjeflaten
– Gøy, var konklusjonen frå elevane ved Hegglandsdalen barneskule då dei fekk prøve orientering på Kyrkjeflaten onsdag.
Bildeserie:
Det var eit yrande liv på Kyrkjeflaten i 12-tida onsdag. Då hadde nemleg omlag 70 elevar frå Hegglandsdalen skule teke turen ut Dalen for å vera med på forsøket om å setta verdsrekord i orientering.
Os orienteringsklubb er nemleg onsdag med i eit internasjonalt verdsrekordforsøk om å samla flest mogleg til orientering på same dag. Målet er å passera 250 000 på verdsbasis. Har du òg lyst til å vera med så held dei på til klokka 20 i kveld.
– Klart vi måtte vera med. Dette er kjempekjekt, fortalde lærarane medan dei såg elevane gav alt i dei forskjellige orienteringsløypene.
– Vi har lagt opp til ulike løyper her på kyrkjeflaten. Stolpane ute på plenen er tilsaman seks ulike løyper og skal læra elevane å finne retningen ut frå kartet, forklarar Tommy Sævareid i Os orienteringsklubb.
– I tillegg har vi laga ei miniskulpturløype med dei skulpturane som er her, og ei stolpeløype rundt gangstien, kor dei får testa kor fort dei klarar å springa.
– Kvifor gjer de dette?
– Ein ting er sjølvsagt verdsrekordforsøket, men eg trur dette er vegen å gå for å rekruttera fleire til orienteringssporten. Om dei synest det er kjekt, så blir dei gjerne med oss på treningar. Håpet er å få til ei barne- og ungdomsgruppe med rundt 30 utøvarar, seier Sævareid.
I tillegg til elevane frå Heggelandsdalen, hadde også borna i Flåten Naturbarnehage vore innom tidlegare på dagen.