Nytt uteområde til 1,4 millionar
Ungar og tilsette i Os Barnehage kan gle seg over ein heilt ny boltreplass utandørs.
Bildeserie:
I dag, 1 år og 4 månadar etter at nybygget sto ferdig, opna Os Barnehage uteområdet pånytt. Nesten heile tomta og alt leikeareal utanom asfalten rundt barnehagen er fornya.
– Det var svært dårleg drenering på tomta og det har vore eit mareritt å ha teknisk drift. Det var også krevjande masse for entreprenørane å jobba med, fortel avdelingsleiar Dag Søfteland i teknisk eining i Os kommune.
I dag takka han prosjektleiar Torunn Paus og entreprenørane Os Anlegg AS og Sandvik Bygg AS for godt gjennomført jobb - frå 4. mai til i dag.
– Starten blei litt tung, med ein mobilkran som flytta vekk leikehyttene. Kranen sleit med leira som ligg her, fortel Robert Kaastad frå Os Anlegg.
Han seier det har blitt laga 125 meter med dreneringsgrøft, kjørt vekk 25 lass med leire og jord og henta inn 120 tonn singel og 240 tonn pukk.
Fekk mykje for pengane
Resultatet er strålande. På toppen av dei nye, drenerande massane har barnehagen fått eit stort område med vedlikehaldsfritt fallunderlag, mange nye leikeapparat, eit lite amfi og ein dekorativ bekk med rennande vatn av den velkomne sorten - rett i ein kum.
Uteområdet blei opparbeidd etter budsjett, 1,4 millionar kroner eks meirverdiavgift.
– Os Anlegg har dessutan skaffa oss klasse A-stein til klasse B-pris og Sandvik Bygg har sponsa med mykje gratis jord, fortel Søfteland.
Om det å innrømma
Både rådmann Knut Terje Rekve, varaordførar Marie Lunde Bruarøy, kommunalsjef Line Rye og ordførar Terje Søviknes var med på opninga.
Søviknes klipte snor saman med assisterande styrar Liv Jansen. Men først ville han innrømma noko for ungane.
– Å innrømma noko betyr gjerne at du har gjort noko gale. Og då barnehagen opna så lovde eg å koma tilbake til dette med planter, men det gjorde eg ikkje.
– Eg lovde to frukttre, men dei kom eg aldri med, så i dag har eg med meg fire frukttre, fortalte han, før ungane blei oppmoda om å tippa kva frukt det var.
Dei som tippa eple og plomme hadde rett, dei som tippa paprika og appelsin blei kanskje litt skuffa.
7 fulle avdelingar
Os Barnehage har, med åtte avdelingar, kapasitet til 150 born.
Jansen fortel at Os Barnehage, som i fjor stengte den 8. avdelingen, har ganske fullt med 129 ungar.
– No startar 27 av desse på skule til hausten, men det kjem inn omtrent like mange, så det er få ledige plassar og ingen plan om å opna den 8. avdelingen med det første.