Nye eigarar og ny butikk
Bjoarvik Bilverksted endrar eigarar og namn. I tillegg kjem BilXtra med butikk i Jordmorsvingen igjen.
Rune Balland, som har vore med i Bjoarvik Bilverksted sidan starten sommaren 2008, har overtatt alle aksjane i selskapet.
– Nett no eig eg 100 prosent, men kollegaen min Yngve Bergo skal inn som medeigar og namnet på selskapet skal endrast til Os Auto AS, fortel Balland.
Det var kjeden verkstaden er medlem i, BilXtra, som kjøpte Arne og Oddgeir Bjoarvik sine aksjar. Så blei desse overtatt av Balland.
– Oddgeir satsar vidare på nyare bruktbilar, camping og bubil, og Arne har jo trafikkskulen. Vi med verkstaden kjem til å halda frammed å leiga av Bjoarvik i Jordmorsvingen, og vi kjem nok til å ha eit fint samarbeid med service og verkstadarbeid på skulebilar og bilar for sal framover òg.
Fin utvikling
Rune hadde jobba på ulike merkeverkstadar i Fana i 25 år då han kom tilbake til Os og starta Bjoarvik Bilverksted saman med Oddgeir Bjoarvik og Stian Mjelde 1. juni 2008.
Nokre år seinare flytta dei frå Industrivegen til Jordmorsvingen.
– Vi ligg fint til her ved Byvegen og har hatt bra auke etter at vi flytta.
Overtar etter Dekk1
Dekk1 opna i eine enden av bygningen kort tid etter at Bjoarvik hadde overtatt den tidlegare industrieigedomen.
– Dei har lagt ned Os-avdelinga si og er i ferd med å flytta ut, fortel Balland.
Os Auto kjem til å overta både dekkhotell og sal av dekk.
BilXtra opnar butikk
Medan Os Auto overtar dekkhotellet kjem det andre ting i resten av lokalet Dekk1 disponerte.
– BilXtra opnar butikk med bra spekter av bilutstyr, frå svampar til takboksar.
Det er Vest Bilustyr på Kokstad som skal driva BilXtra-butikken på Os. Ifølgje Balland har dei plan om å opna butikken i starten av februar 2012.