Nydeleg av Myrna
Braza og båtbygging passar fint saman, det blei ein skikkeleg kosekveld i Vognhallen fredag.
Bildeserie:
Fredag arrangerte båtbyggarane Bjørnevik og Kvalvik konsert i Vognhallen.
Kva som blei feira er uvisst, men dei to er nesten ferdig med halsane til åttringen dei bygger, og desse halsane har blitt hogne for hand, så kanskje var avslutta halshogging verdt ein liten fest med ein god konsert?
Heimelaga
Uansett var det gjennomført og stemningsfullt denne siste septemberkvelden, som forresten blei ein av årets varmaste kveldar (!).
Publikum kom sigande frå nord og sør og løyste billettar som besto av trefliser med merke frå sprittusj.
Plattingen som båten blir bygd på eigna seg godt som scene, og publikum fekk både sider, peanøtter og tebrød.
Litt av neste plate
Men først og fremst fekk dei ein fin konsert av ei Myrna, som såg ut til allereie å vera klar for kveldens neste konsert, på Bar2Be.
Bergensartisten med kjæraste og produsent frå Os (Thomas tomtom Bruarøy Haugland), fann seg fort tilrette i Vognhallen. Det gjorde også Thomas, Olav, Ellen og Fredrik i bandet - det blei uformelt, leikent og groovy.
Myrna starta med Crazy før ho gav oss smakebete av albumet som kjem i haust i form av My Cocaine.
Medan nysgjerrige tilskodarar stoppa på fortauet utanfor Vognhallen serverte Braza låtar som Changes og Free as a Bird, lett akkompagnert av måseskrik og putringa frå påhengsmotorar på veg på fjorden for ein av årets siste båtturar.
Midtsiden kjem tilbake med video frå konserten.