Ny motebutikk opna i sentrum i dag
Dysvik Clothing kom i mål til planlagt tid - no er det streetwear og italiensk mote i det tidlegare G-Sport-lokalet.
Bildeserie:
I starten på oktober fortalte ekteparet Tanya og Kay André Dysvik om planar om å opna butikk i Os sentrum.
– Det har gått fint å bygga butikk, men dagane har gått fort for det har vore så gøy, seier Tanya.
– Vi har fått god hjelp av lokale fagfolk, blant anna Bjarte Nøstdal som har snekra innreiinga for oss, seier Kay André.
Sko, caps og klede
Før opning klokka 11 i dag var det allereie 5-6 kundar i butikken.
– Her, ta eit glas eplemost frå Strandebarm, seier Kay André, nøgd med at alle varene kom til opningsdagen.
– Siste leveranse kom tysdag, så då var det berre til å få på pris og få det i hyllene.
Klede til ungdom og vaksne, caps, luer, solbriller og sko, er i utvalet.
– Vi har fått inn alle merka vi ønskjer, men det kjem endå fleire etter nyttår.