Ny leiar i Os Høyre

Os Høyre hadde årsmøte torsdag. Der blei Susanne Sperrevik valt inn som ny leiar. Avtroppa leiar, May Britt Haringstad Mjøs, er med vidare som vara.

Styret: Susanne Sperrevik (leiar) Bjørn Matland (nestleder), Sissel Stuberg, Audun Rainer Busch Bonnier, Bjørn Sivertsen, Rolf Tveit og Henrik Vågen.
Vara: May Brit H. Mjøs, Hege Hafsaas, Fridtjof Joys Christensen, Emil Tetlie Brimsholm (personleg vara for Henrik Vågen) og Ernst Hoff (personleg vara for Bjørn Sivertsen).

– Eg var innstilt som leiar før valet, og var førebudd på å halda fram, men eg var òg klar over at det ville koma benkeforslag, seier May Britt Haringsad Mjøs.

– Eg har allereie fleire tunge verv, med fast plass i kommunestyret og som nestleiar i plan- og bygningsutvalet, så eg er glad det kom ei dame som Susanne inn. Ho har ein enorm arbeidskapasitet og, sjølv om ho er rimeleg fersk i politikken, lang fartstid innan styrearbeid og det å driva firma. Saman med rutinerte Bjørn Matland trur eg vi får ei leiing som matchar kvarandre godt.

– Eit ønskje å involvera fleire

Sperrevik klatra nokre plassar under valet og kom saman med Børge Lunde inn som vara i kommunestyret.

– Med fire faste i kommunestyret og fleire av dei same i styret blei det få involverte personar, noko det var eit ønskje om å betra på. Det er lett for at når nokre få er involvert i mykje, så er det lett for å tru at alle medlemmane er godt informert.

– No er vi fleire som er engasjert og blant mine mål, i tillegg til å verva fleire medlemmar til partiet, er å informera og engasjera flest mogleg av eksisterande medlemmar, seier den nyvalte leiaren.

Susanne er òg glad for samansetjinga i styret, med fleire erfane politikarar saman med fleire nye ansikt.

Les òg: Den korte vegen til litt makt

Tar imot helseministeren tysdag

No ser Sperrevik fram til å ta imot helse- og omsorgsminister Bent Høie (H) i Os allereie tysdag.

Han kjem til Os kommune for å fortelja om ny helse- og sjukehusplan, betre eldreomsorg og ny demensplan.

Etter å ha informert lokalpolitkarane på dagtid er det ope møte i Os Eldresenter, med fri entré, frå klokka 16 førstkomande tysdag.