Ny heim for gamal UFO
Søfteland barneskule har i mange år hatt sin eigen UFO. No er han blikkfang langs E39.
- Midtsiden har starta utsending av gratis nyheitsbrev på epost - meld deg på her
Etter å ha pynta skogsområdet på Søfteland barneskule i over 15 år, har det no vorte flytting og ein ny heim for den gamle UFO-en.
Slick Iverson (30), som han kallar seg når han er i UFO-humør, gjekk sjølv på barneskulen då UFO-en vart avduka.
No har han tatt den med seg heim.
– UFO-en var i utgangspunktet eit kunstprosjekt på Søfteland barneskule for mange år sidan. Då eg køyrde forbi skulen her om dagen såg eg at dei hadde rydda litt skog, og i tillegg at dei hadde tatt ned og demontert den gamle UFO-en.
– Då spurte eg dei om eg kunne ta den med meg heim, og det gjekk fint.
– Sjølv om det hadde vore kjekkare å seia at den landa i hagen min og at eg ikkje veit kvifor, humrar Iverson.
Eigne UFO-planar
Vidare kan Iverson fortelja om eigne planar om den gamle UFOen.
– I utgangspunktet er det berre litt pynt. Sjølv om det hadde vore kjekt å grava den litt ned i jordet, som om den verkeleg hadde krasjlanda. For så å setja opp ei røykmaskin. Då trur eg folk hadde reagert på ein annan måte. Men vi får sjå kva framtida bringer.
LED-lys drifta på solcellepanel er allereie montert, disken i hagen lyser opp om kvelden.
– Søftelendingane har no litt kjennskap til denne UFO-en, og eg tenkte at det er kjekkare å ta vare på den enn å kasta den, avsluttar Iverson.
