NRK filma Knut si oppkøyring
– Det er ikkje lov å ha andre i bilen under førarprøven, det dei gjorde var ganske unikt, seier køyrelærar Arne Bjoarvik om Norge Rundt-opptaket.
Bildeserie:
Onsdag for ei veke sidan fylte osingen Knut Spangelo Haga 18 år. Dagen etter skulle han eigentleg ha oppkøyring på Stord, men fotballspelaren, som utanom skule speler på Os sitt A-lag, hadde takka ja til ein uventa invitasjon.
– Eg hadde ikkje noko imot at dei var med, og det var faktisk gøy å sjå korleis eit TV-team jobbar, seier Knut, som fekk spørsmål om å utsetja førarprøven fem dagar så NRK kunne filma.
I går var den store dagen, og NRK blei med i bilen frå Os med ferja til Stord for å dokumentera den praktiske førarprøven.
På Norge Rundt fredag
– Vi hadde med oss to elevar, Knut og ein gut frå Sandsli som heiter Michael, dei var begge sporty og stilte opp, seier Arne Bjoarvik frå Bjoarvik Trafikkskole.
Fråvær i skulen og dei nye krava skal ikkje ha vore tema.
– Eg er usikker på om det var noko spesielt tema, men dei spurde mange spørsmål. Nokre gongar ville dei filma same spørsmål éin gong til, for å filma frå ein annan vinkel, men då blei eg heilt sett ut. «Kva var det eg sa i stad, då?» spurde eg, nøgd med første forsøk, fortel Arne og ler.
Ifølgje Bjoarvik skal opptaket sendast på Norge Rundt allereie førstkomande fredag.
– Spesielt opptak
Arne fortel at fleire i førarskulemiljøet skal ha reagert på at NRK har filma ein førarprøve.
– Det er ganske strenge reglar for kven som kan vera med i bilen. I tillegg til sensor er det berre ein ekstra-sensor, eventuelt ein tilsynsførar, som kan vera passasjer.
– Men TV-kanalen hadde ikkje fotograf om bord. Dei rigga tre kamera i bilen, så det er nok innanfor. Eg reknar uansett med at store organisasjonar som NRK og Statens vegvesen nok hadde ein avtale på førehand.
– Det hjelpte meg å slappa av
Oppkøyring er ein stor og spennande dag, og Knut synest ikkje det var stressande at det heile skal koma på TV.
– Det var heller motsett, eg fekk noko anna å tenkja på så eg rakk ikkje å kvi meg så mykje.
– Dei monterte to GoPro-kamera i front, og dei gløymde eg nesten då eg starta å køyra. Men kvar gong eg skulle rygga blei eg minna på det, for i baksetet var det montert eit stort kamera, seier Knut.
Verken han eller førarlæraren vil røpa korleis det gjekk med oppkøyringa.