Nordvik-elevar kjem til Lysekloster

I tenesteutvalet onsdag fortalde Line Rye at dei har fått ei avklaring på Nordvik Skule. Bergen kommune har nemleg bestemt å leggja ned Nordvik skule og i staden flytta elevane over til Kirkevoll skule.

I saksframlegget som byråd for barnehage, skule og idrett i Bergen, Pål Hafstad Thorsen (Ap) la fram for bystyret i juni 2016, gav han ei opning for at dei elevane som i staden ynskja å gå på Lysekloster kunne søkje seg dit.

Utfordring med romløysingane

Avklaringa Rye har fått frå Bergen kommune fortel at mellom 12 og 14 elevar har vald å takke ja til å gå på Lysekloster skule i staden for Kirkevoll.

– Desse elevane betaler Bergen kommune gjeste-elevsats for.

– Utfordringa er at vi på Lysekloster skule må dele to klassetrinn og ha to paralleller på første trinn frå hausten av. Det gjer at vi får litt utfordring med romløysingane. Heldigvis tok vi høgde for det då vi bygde om skule, slik at vi har eindel uinnredde rom, fortalde Line Rye, kommunalsjef for oppvekst og kultur.

Større jobb enn ein forutsåg

For å få plass til dei nye elevane må kommunen ta arbeidet med å gjera ferdig heile skulen tidleager enn planlagt.

– Vi må sjå på finansiering for å realisera resten av Lysekloster skule. Det viser seg at det er ein litt større jobb enn vi forutsåg. Difor må skulen leva med litt mellombelse løysingar ei lita stund. I løpet av det kommande skuleåret håper vi det skal vera på plass. Det vil kreve litt fleksibilitet frå skulen, men det skal vi klare. Det er inga Kuventræ nummer to dette, som krev eit hastevedtak, forsikra Rye.

Fast betalingssats

Gisle Hesjedal (Ap) undra på om Os kommune ville gå i null med elevane frå Bergen eller om ein risikerte å gå med tap.

– Du seier du får betalt for gjesteelevane. Er det faste statlege satser? Er dei i såfall berekna slik at vi i teorien skal gå i 0 eller er det ein risko for tap, undra Hesjedal.

– Vi har vurdert at det skal dekke inn det det kostar å ha elevane hos oss. Det er ein felles sats. Det som er utfordrande er at vi må ferdigstilla bygget. Det hadde vi måtte gjort uansett, men no må vi gjera det litt før vi hadde tenkt, svara Rye.