– Noko kommunen kunne ha lokka turistar med
Søndag er det skulpturvandring i eit heilt unikt bygdesentrum.
Os Internasjonale Skulptursymposium, som har blitt arrangert annakvart år sidan 1999, er i år del av Bjørnafjorden Kulturfestival.
Steinhoggarsymposiet går mot slutten, men før avsluttingsseremonien søndag ettermiddag inviterer symposiumleiar Arne Mæland til ei vandring med forteljing.
– Skulpturvandringa startar klokka 12 og er ferdig klokka 13. Det er inga påmelding, berre til å møta opp i Vognhallen, seier Mæland.
– Vi held oss på vestsida av hamna, elles blir turen for lang.
Noregs skulpturbygd nummer éin
Då vi møtte han på Kyrkjeflaten for intervju, var han tidleg ute.
Mens han venta møtte han eit ektepar frå Tyskland, som ville veta meir om nokre av dei sju skulpturane i denne delen av Os sentrum.
– Vi er på gjennomreise, men har overnatta i bubil på Steinneset. Det er første gong vi er i Os, og vi synest det er fantastisk fint her! seier ekteparet Martina Taeger og Karsten Gericke.
– Besøk av vertsskap som ønskte velkomen var ei positiv overrasking, og no denne fine skulpturparken.
Dei sju skulpturane på Kyrkjeflaten er langt frå dei einaste.
Etter over 20 år med symposium, med ulike kjøparar og gåvegjevarar, har fleire blitt ståande igjen for å prega vertskommunen.
– Det er over 25 skulpturar i Os sentrum. Eg er temmeleg sikker på at Os er den tettstaden i Noreg med flest skulpturar.
Fleire av skulpturane er «aktive», dei innbyr til klatring, kvile eller leik. Det var også tanken bak, og det gler Mæland å sjå at det også fungerer.
– Mange reiser langt for å sjå skulpturar, og let seg generelt fascinera der dei er på tur.
– Os har mykje bra, at vi er Noregs skulpturbygd nummer éin er noko som kunne vore med å trekka turistar til kommunen, meiner Mæland.
Ein del av Berlin-veggen (ikkje muren)
Fleire av dei er laga av kjente skulptørar, som Kristian Blystad sin båt, som fungerer som ein stor benk ved dammen her på Kyrkjeflaten.
Blystad har stått for ei lang rekke store, offentlege utsmykkingar, som Kong Christian Fredrik framfor Stortinget og den store fasadeveggen på den nordiske ambassaden i Berlin.
Båten på Kyrkjeflaten er laga av «skalken» på denne fasadeveggen, og kom til Os i 2015.
– Det er vanleg å bli nysgjerrig når du ser ein skulptur. Kven har laga den, kva er den laga av og kva er historia bak. Det skal eg prøva å svara godt på når vi er på vandring i morgon.
