Nøgd med trekninga

Sverre Lunde Pedersen har fått ein kanonstart på sesongen og har imponert med mellomanna å koma på pallen på 1500 meter under verdscupopninga og å slå Håvard Bøkko på langdistansane under NM.

Denne helga er det duka for EM i Heerenveen i Nederland.

- Klokka 1753 startar det, og vi har ikkje akkurat tapt trekninga, meldte landslagstrenar Jarle Pedersen på twitter torsdag kveld.

Og sjå berre her:

På 500 meter går Sverre i åttande par med russiske Denis Yuskov, Håvard Bøkko i 11-par mot polske Zbigniew Brodka før Simen Spieler Nilsen møter skeisestjerna Sven Kramer frå Nederland i tolvte og nest siste par.

På 5000 meteren seinare fredag kveld er det duka for det eine storløpet etter det andre når Sverre avsluttar 5000 meteren i 13. par mot nederlandske Jan Blokhuijsen. Før det har Håvard Bøkko møtt Sven Kramer i tiande par og Simen Spieler Nilsen Renz Rotteveel frå Nederland i åttande.

Medaljekandidat

Håvard Bøkko har ikkje vore snauare enn at han har lansert lagkamerat Sverre Lunde Pedersen som medaljekandidat under helgas EM.

Sjølv har ungguten litt lågre ambisjonar og står fast på målsettinga om topp fem, slik det har vore heile sesongen.

- Eg står fast på den. Det er såpass mange gode løparar at eg må ha full klaff for å klara det, seier Lunde Pedersen til NTB.

- Det kjem til å vera lite som skiller tredje og femte plassen. Det er mogleg å klatra høgre, men eg vil ikkje gå ut å seie at eg skal ta medalje.

Sverre kan du følgje på NRK 1 og NRK 2 frå klokka 1750 i ettermiddag.