Nøgd med solide gjennomslag i statsbudsjettet

Mens andre nestleiar i Frp, Terje Søviknes, i dag har lagt fram forslag og diskutert budsjett for Bjørnafjorden kommune, har resten av partitoppane forhandla seg ferdig med regjeringspartia.

– Eg er vant med å jobba mykje, men dei siste vekene har vore ekstreme, seier Søviknes til Midtsiden.

Ved sidan av sentrale forhandlingar har han deltatt i å laga budsjett internt for Frp Vestland og saman med Høgre i Bjørnafjorden.

Forhandlingane gav resultat som blir synlege i heimbygda.

– Vi fekk gjennomslag for 5 millionar ekstra til rehabilitering og vedlikehald av Ole Bulls villa på Lysøen. Dette er ei sak eg og stortingsrepresentant Silje Hjemdal har engasjert oss sterkt i, seier Søviknes.

«Vi veit det ikkje er nok» sa kulturminister Abid Raja då han i oktober la fram forslag om 9,5 millionar til Lysøen.

Meir makt på utsida av regjering

I starten opplevde Søviknes at regjeringspartia såg ut til å ta støtte frå Frp for gitt.

– Kanskje dei trudde at vi ville vera varsame for å unngå regjeringskrise midt i ein pandemi?

Men Frp sette foten ned og har blant anna fått gjennomslag på reduserte avgifter (over 7 mrd kr), auka pensjon (over 2 mrd kr), styrka nettolønnsordningen for sjøfolk, meir til helse og omsorg, betydelege midlar til samferdsle og innstramminger i innvandringspolitikken.

– Vi har fått flytta på 18 milliardar kroner, og det er historisk høgt. Eg synest samtidig at det er eit paradoks at vi har fått gjennom større avgiftslette på utsida av regjering enn på innsida, der vi ofte måtte svelgja kamelar i form av ei rekkje avgifter - for å koma i hamn.

Billigare snus - meir til pensjonistane

5 milliardar for å redusera grensehandel, blant anna i form av reduserte avgifter på snus og alkohol, reknar han òg med er historisk.

– Som oftast har det gått motsett veg på tampen av forhandlingar, at det har kome nokre ekstra utgifter på alkohol, tobakk, sukker eller andre ting for å henta inn dei siste kronene.

– Dei som uansett har mest å gle seg over i statsbudsjettet for 2021 er nok pensjonistane som no slepp den forhatte underreguleringa på 0,75 % i forhold til den generelle lønsveksta. I tillegg får minstepensjonistane 5000 kroner ekstra frå og med 1. juli neste år.