No kjem turskilta

Idrettskonsulent Tom Leonsen presenterte i kommunestyret tysdag dei nye turskilta, som følgjer den nye nasjonale standarden for turskilt kor turane graderast etter kor harde dei er og vanskelegheitsgrad.

Systemet er det samme ein kjenner frå til dømes alpinbakkar kor nedfartane klassifiserast som grønne, blå, raude og svarte.

Utvikla nye skilt

I mai 2011 søkte Os kommune om midlar til merkeprosjektet frå Gjensidigestiftinga sin pott. No kjem altså dei første skilta.

- Dei to første turane er turnettet ute på Lysøen og Strandvegen.

- Sidan vi skulle skilta langs veg der det var aluminiumsskilt frå før var i raskt ute og spurte leverandørane om det det gjekk ann å laga skilt i dette materialet, forklarte Leonsen.

Saman med leverandørane har han utvikla standardskilt i aluminium som er i tråd med dei andre standardskilta i tre og plast.

- Litt moro er det jo at våre skilt for Os no blir brukt i reklamen frå firmaet som leverar skilt over heile landet, smilte idrettskonsulenten.

To turar i starten

Dei to turane som no blir skilta har òg kome med på eit vandrekart for Hordaland, med ein verbal beskriving av startpunkt, parkering og turen.

- Vi har eit særs godt samarbeid med Os Turlag og vil saman med dei gå i gang med å merka fleire turar i kommunen.

- Det gjenstår noko arbeid i høve til avtalar med grunneigarar, men vi er på gang, forsikra Leonsen.

Har vore etterlyst

Ein som satte særleg pris på at skiltinga no kjem på plass var ordførar Terje Søviknes (Frp).

- Det har lenge vore etterlyst betre skilting av Strandvegen.

- At det no kjem på plass er bra, så får vi berre jobba vidare med dei andre turstiane, konkluderte ordføraren.

Leonsen rekna med å få resten av skilta i hus i løpet av januar og at merkinga då kunne ta til.