No kjem skilta

Fylkeskommunen og Skyss skal etablera pendlerparkering på myra ved Rema Kuven. Som ei mellombels løysing har dei inngått avtale om å leiga plass på parkeringa til butikken.

- Frå måndag 12. september vil denne parkeringa vera i drift, fortalde kommunaldirektør Karl Ole Midtbø i formannskapet tysdag.

- Dei som har PeriodeSkyss må få eit oblat som syner at dei har lov til parkera der og å stå der heile dagen, forklarte Midtbø.

Det vil truleg frigjera parkeringsplassar i sentrum og danne grunnlaget for handheving av parkeringsbestemmelsane i sentrum.

Befaring 16. september

Når det gjeld skilting og merking av parkeringsplassar i sentrum er heller ikkje dette langt unna.

- Skiltplanen er no til godkjenning hos Statens Vegvesen og Hordaland Politidistrikt.

- Dei kjem på ei befaring fredag 16. september for å sjå på tilhøva.

- Eg håpar og trur det ikkje skal gå for lang tid etter det før skilitinga er på plass, fortalte Midtbø.

Allereie i neste veke vil truleg parkeringsselskapet som skal stå for den praktiske merking i sentrum starte sitt arbeid med å kosta og merke opp parkeringsplassane.

- Det er litt vêravhengig og avhengig av kapasiteten deira, så eg må ta eit lite atterhald, men forhåpentligvis kjem dei i gang.

Sjå på dagparkering

Marie E. Lunde Bruarøy (H) oppmoda kommunaldirektøren om å sjå på dagparkeringa i sentrum i samband med skiltinga.

- Det er naturleg å sjå på den når vi har fått bebuarparkeringa i sentrum på plass.

- Dei som bur i sentrum vil få parkeringsplassar ved kyrkjeflaten og ved Osbruo. Når vi har fått etablert desse veit vi meir om kva kapasitet vi har i høve til dagparkering i sentrum, avslutta kommunaldirektøren.