– No kan vi laga thaimat!
Os Lokallag av Norges Handikapforbund har medlemmar frå 8 til 84 år gamle. I april og mai fekk dei kokekurs sponsa av Extrastiftelsen.
Bildeserie:
I haust søkte Os Lokallag av Norges Handikapforbund om midlar frå Extrastiftelsen til å kunne gjennomføra matlagingskurs for medlemmane sine.
«ExtraStiftelsen er en stiftelse bestående av 28 frivillige organisasjoner, som eier og fordeler overskuddet fra Extra-spillet. Overskuddet går til frivillige organisasjoners helseprosjekter.»
I desember fikk dei svar på søknaden, og fekk tildelt 10.000 kroner.
– Os Lokallag har 43 medlemmar frå 8 til 84 år gamle. Medlemmane er i hovudsak frå Os, men også frå nabokommunar som Fusa, Tysnes og rett over kommunegrensa til Bergen, fortel leiar Rita Samdal.
– Medlemmane våre har ulike typa av handikap, frå problem med bekkenløysing til slagramma. Vi har mest aktivitet i laget på våren og sommaren, blant anna med grilling hos Os Rotary på Ramsholmen, i tillegg til ein årleg populær avslutningsfest med julebuffet i Oseana.
– Å få dette kurset som ein lærerik, smakrik og sosial start på våren var veldig hyggeleg, synest Samdal.
2 x 3 timar med lokal vegleiing
Asia Mat på AMFI Os blei hyra inn som kurshaldar.
– Dei er veldig flinke og hyggelege, det er kjekt at vi kan bruka denne type lokal kompetanse.
Deltakarane fekk grundig innføring i fleire rettar, både vårrullar, rød curry, eksotisk frukt og innbakt banan med vaniljesaus.
– Vi hadde kurs tre timar ei søndag i april og tre timar ein søndag i mai. Kursa var veldig populære og maten smakte fantastisk, seier Rita Samdal.
Kursa blei gjennomført på skulekjøkkenet på Os ungdomsskole.