– No kan vi bestemma

26 elevar i niande klasse ved dei tre ungdomsskulene i Os har måndag og tysdag vore i kommunestyresalen for å skolerast til å bli ungdommar med MOT. Det er femte gongen kommunen utdannar ungdomsskuleelevar i MOT-programmet, men første gong det skjer i salen kor dei viktigaste avgjerda i kommunen blir fatta.

- Då dei kom inn her var reaksjonen, at no kan vi bestemma sidan vi her her, ler Kjersti Tysse Plätzer, som saman med Ellen Merete Lyssand og Anne Solberg Andersson har hatt ansvaret for ungdommane.

Frå mottakar til sendar

Elevane, som no går i niande klasse, fekk sjølv vitjing av ungdommar med MOT då dei gjekk i sjuande klasse.

- Det skal bli spennande å vera dei som no skal førebu sjuande klassingane om overgangen til ungdomsskulen.

- Vi har lært utruleg mykje nytt, men det å stå foran ei klasse og få dei til å vera med på opplegget gruar vi oss litt til, fortel dei unge MOT-ungdommane.

Tørre å ta val

Ungdommane fortel om eit positivt møte med MOT.

- Det er veldig bra at Os er ein MOT-kommune.

- Både det at vi skal hjelpa sjuandeklassingane med overgangen til ungdomsskulen, men òg det at MOT er med på å gje oss og andre ungdommar tryggleik og tru på oss sjølve.

- Det er eit positivt program som hjelper oss til å ta eigne val, ikkje berre på ungdomsskulen, men òg i vanskelege situasjoner utanom og i resten av livet, forklarar dei 26 ungdommane.

Dette er MOT

MOT er ein haldningsskapande organisasjon som jobbar for og med ungdom.

MOT sitt mål er å bidra til robuste ungdommar og trygge ungdomsmiljø.

MOT har ein helhetleg modell for korleis lokalsamfunn kan jobba saman med ungdom. Heilhetsmodellen består av program i ungdomsskulen, vidaregåande skule og på ungdommen sin fritidsarena. Gjennom ung til ung-formidling, øvingar, historiar, dialog og rollespel blir ungdommane bevisste til å ta eigne val, ta vare på kvarandre og visa mot.

Organisasjonen blei stifta av Johan Olav Koss og Atle Vårvik i 1997.