– No er det fullt kjør
For mange er tida førebuing til 17. mai travel, men nokre av dei som kanskje har det mest hektisk er skreddarane i Os.
Bildeserie:
I eit lokale på Lundehjørnet finn vi Johansen Skredderstue.
Åshild Johansen har vore skreddar i Os i 19 år, og for to år sidan flytta ho verkstaden sin ein etasje ned på gateplan, vis a vis Lucianos.
- No er det fullt kjør her, fortel Åshild.
- Det er høgsesong og det blir jo ekstra travelt når alle skal ha kleda sine samtidig.
Enklare med skreddar
Sjølv om det går mykje i bunadar på denne tida av året så held Åshild også på med rettingar av alle typar klede, inn- og utsying, og så syr ho for fleire av butikkane i Os.
- Butikkane kjem inn med plagg som kundar har kjøpt, men som dei vil retta litt på.
- Eg syr òg heile bunadar og merka veldig stor auke i bestillingar etter at Bunadverkstaden gav seg i sentrum.
Ho merkar at det ikkje er så mange som syr kleda sine sjølv lenger, det er enklare å koma innom og få det sydd.
- Det er ikkje det same som då vi vaks opp, no har dei jo knapt handarbeid på skulane.
Hektisk i Hegglandsdalen
Sjølv om Bunadverkstaden la ned virke sitt i fjor er framleis ein tredel av denne enno aktiv.
I lokalet til den nedlagde butikken i Hegglandsdalen opna Aud Jørgensen Bundasbutikken i august.
– Det var litt for tidlig for meg å bli pensjonist no, og så trivst eg godt med handtverksarbeid, så då starta eg opp her.
Ideen fekk ho då ho køyrde forbi det tomme lokalet kvar gong ho skulle til Os.
– Eg tenkte "kvifor køyre forbi eit tomt lokale", så no er eg her og brukar halve tida på å reisa på jobb enn då eg jobba i sentrum, fortel Aud.
Bestillingar til 2020
I Bunadsbutikken går det både i heile bunadar, rettingar og tilbehøyr – og til sal av garn.
– Det er fleire som får ferdigsydd bunad, medan nokre syr sjølv eller går på kurs.
Dei fleste har fått med seg at Aud har heldt fram med bunadverkstad og bestillingslistene deira går heilt fram til 2020.
– For å få sydd ein heil bunad så må ein vera tidleg ute, minst to år før den skal vera ferdig.
Det er ei hektisk tid med konfirmasjonar og 17. mai og ho merker også at det har vore litt ekstra dette året i samband med grunnlovsjubileet.
– Ein kunde kom inn og fortalte at dei hadde fått bunadstvang, så ho måtte få retta på bunaden som ikkje hadde vore brukt sidan konfirmasjonen, humrar ho.