No blir bølgedemparen forankra
Fredag formiddag kom bølgedemparen til Os - no går helga med til forankring.
Bildeserie:
Den spesialdesigna bølgedemparen, den første av planlagte fire, kom til bjørnafjordenområdet frå fabrikken i Talling torsdag for ei veke sidan.
No har den lagt til kai i Strandvik, der utstyr og signallys er montert, og klokka 10 i dag var den på plass ved dei første forankringspunkta utanfor Os hamn.
– Skal ligga ved moloen
På førehand har Egersund Group, som har oppdraget med forankringa, festa fire boltar i fjell eit stykke utanfor der bølgdedemparen skal ligga.
– Det er desse som blir festa først, fortel prosjektleiar Tor Inge Døsen frå Os kommune, på plass på moloen for å sjå ankomsten.
– Han skal ikkje ligga der ute ved blåsene, men rett innanfor moloen frå Mobergsneset. Når desse fire er festa skal det anker og eit kobbel med liner for å få den på skikkeleg på plass. Arbeidet med forankringa kjem til å halda fram i dag og laurdag, kanskje også søndag.
Mål
• Vekt: 75 tonn
• Lengde: 50 meter
• Breidde: 1,5 meter
• Djupstikk: 3,36 meter
Bruker minst 21 millionar på skjerminga av hamna
Os kommune har i utganspunktet sett av 21 millionar kroner til skjerminga av hamna.
Om denne første bølgedemparen fungerer, og dei tre neste blir bestilt, vil prisen bli høgare, har det vist seg.
No håper Os kommune på nokre kraftige stormar frå rett retning, så denne første bølgedemparen får vist om han fungerer.