NM-siger til Os skulekorps
Deltok for første gong på fem år, meldte seg opp éin divisjon og stakk av med sigeren!
Bildeserie:
I helga har Norges Musikkorps Forbund (NMF) arrangert NM i brass i Stavanger og NM i janitsjar i Larvik, der også NM i drill gjekk av stabelen.
Os skulekorps deltok i janitsjar, og meldte seg opp i 2. divisjon.
– Vi har hatt ein langtidsplan der det å delta i NM i 3. divisjon i 2017 var eit av måla. Men etter at vi i vinter vann 2. divisjon i Hordablæsten bestemte vi oss for å delta i 2. divisjon i NM òg, seier dirigent Marius Fevang Thorstensen.
Os skulekorps spelte eit stort stykke på rundt 11 minutt, og fekk 94 poeng av 100 moglege.
Det heldt til siger og NM-gull til 22 musikantar frå Os, frå 11 til 19 år i alder (sjå namneliste nedst i artikkelen)!
– Konkurransar er underordna, hovudfokus hos oss er å kunna spela god musikk, å kunna gje publikum gåsehud. Men det er naturlegvis veldig kjekt å få betalt for gode prestasjonar med ein 1. plass i NM, seier Marius.
• Sjå fleire bilde og video frå NM på Os skulekorps si Facebook-side.
Dei to neste korpsa fekk 93 og 92 poeng, så det var jamt i toppen.
Systematisk og grundig
Ein langtidsplan og målsetnad om å klatra har gjort dei unge musikantane gode nok for gull.
– Korleis har du fått musikantane betre? Har det blitt fleire timar på øving?
– Vi har ikkje hatt fleire øvingar enn før, men ungdomane har jobba systematisk og grundig. Vi har hatt lite fråfall og musikantane har vore engasjerte og lærevillige.
– Vi har òg hatt mange gode instruktørar som har følgt musikantane tett, spesielt det siste året.
Inn mot NM har det ikkje handla om tekniske finesser, men om speleglede.
– Dei kan alt dettekniske. Det eg hadde fokus på på veg bort, og på øving i Larvik, var å førebu dei mentalt på sjølve konserten. Då gjeld det ikkje å vera opphengt i tekniske detaljar, men om å levera god musikk. Og det fekk dei til!
Første gong med nytt namn
Åtte foreldre og sju frå juniorkorpset var med som heiagjeng.
– Dei sju juniorane fekk òg med seg eit seminar for juniorar. Dei gler seg no veldig til å starta i hovudkorpset til hausten, seier dirigenten.
Dette var første gong sidan 2012 at skulekorpset deltok i NM, og første gong etter at dei skifta namn frå Os og Kuventræ til berre Os.
– Så og seia alle musikantane var med i NM for første gong.
Dette er dei nye noregsmeisterane frå Os:
Fløyte: Thea Eikeland
Obo: Thomas Hjertaker
Klarinett: Kamilla Steinkjer Bentzen, Regine Engelina Hatvik, Kine Hansen, Maren Benedicte Johnstad og Susanne Bergtun
Saksofon: Maren Maltun og Idun Øvredal
Kornett/trompet: Vibeke Nordtveit, Åshild Underhaug Berle, Erlend Johan Berle og Anders Torsteinbø
Flygelhorn/walthorn: Ragnhild Kristine Midtbø og Carina Nesheim Dyrli
Trombone: Margrete Valle og Joakim Olsen
Euphonium: Stine Eidsvik Flint
Tuba: Jens Christian Hessen
Slagverk: Benjamin Kristiansen, Magnus Kragh Moberg, Henrik Steinkjer Bentzen