NM- og WC-gull til Ina

Kickboxar Ina Grindheim frå Os har hatt ein litt traurig vinter med brot i ein ryggvirvel og dermed mindre trening.

– Treninga har ikkje vore optimal. Det har vore mykje rehabiliteringstrening og lite kickboxing.

– Oppladinga har ikkje vore perfekt, men det har likevel gått over all forventing, fortel Grindheim.

Sitt 8. NM-gull

For tre veker siden gjekk NM i kickboxing av stabelen i Stjørdal, og Ina plukka med seg sitt åttande NM-gull i pointfighting (tidl. semikontakt).

– Eg fekk tre kampar, som eg alle vann på teknisk knockout med 10 poengs overvekt, smiler kickboxaren.

Tapte for tittel-haldar

Sist helg gjekk turen til Innsbruck i Austerrike og World Cup.

– Det var eit stort arrangement med høgt nivå og fightarar frå heile Europa og USA.

Grindheim stilte i si eiga VM-klasse (-65 kg) og i -70 kg for å få ekstra kamptrening.

– I kvartfinalen i -65 kg møtte eg Claire Cocozza frå Canada. Ho er ein veldig erfaren fighter med VM-titlar frå fleire forbund i USA.

– Ho blei for sterk for meg, og eg måtte sjå meg slått med to poeng, fortel Grindheim.

Tok WC-gull etter sudden death

I -70 kg-klassa gjekk det betre for kickboxing-talentet frå Os. Etter å ha vunne dei to første kampane møtte ho Maria Semenkova frå Russland i finalen.

– Ho hadde tidlegare på dagen vunne open klasse, kor alle, uansett vektklasse, konkurrerar mot kvarandre, så eg var innstilt på at det kom til å bli en tøff kamp.

Etter to runder var det uavgjort mellom dei to, og ekstraomgang måtte til.

– Også etter den første ekstraomgangen var det uavgjort og kampen gjekk til sudden death, forklarar Grindheim.

Grindheim held hovudet kaldt og kontrar eit spark frå Semenkova med ei blokk og kryss til kroppen.

– Dermed vann eg finala. Eg har ikkje tatt individuelt WC-gull sidan 2011, så det smakte veldig godt i ein VM-sesong, avsluttar Grindheim.

Sesongavslutning er i World Cup i Rimini 31. mai - 2. juni, kor Grindheim lovar å gå for nytt gull, då i VM-klassa -65 kg.