Nissen kom i helikopter!

Bildeserie:

Full skjerm

1 av 16

– Eg visste ikkje at det var så mange ungar i Øyane, seier initiativtakar Tore Øvreeide.

Det er femte år på rad at ein barnehage blir invitert til nissebesøk på Vaksinen, men Tore hadde gløymt å seia at 20-30 ungar er passeleg mengde.

– Vanlegvis har vi 20-30 ungar her, at barnehagen tar med éi avdeling, gjerne dei eldste. Men her hadde dei tatt med rubbel og bit, alle utanom småbornavdelinga.

Juleprat med statsråden

62 ungar fekk likevel plass, først i to puljer på omvising i hangaren, så i to etasjar i klubbhuset for å eta graut og høyra olje- og energiministeren snakka om jula.

– Vi er veldig takksame for at Terje er med oss år etter år, også no, som statsråd. Han får ta éin tallerk per etasje, så han får snakka med alle.

– Eg har ikkje manus, men plar snakka litt om jula, og korleis eg feira då eg var ung. Då blir det ei og anna forteljing om kva presangar eg fekk. Det var færre gåver den gong, og ein del heimelaga. Far min jobba med maskinering, så eg var heldig. Han sveiste blant anna ei gravemaskin til meg, seier Søviknes.

Vikar for Rudolf

Før grauten blei servert landa nissen - som vanleg - i helikopter. Saman med hjelpar blei han tatt imot med song.

Rudolf og resten av reinsdyra får fri for å vera utkvilt før julaftan, Os Maskin Transport stilte, som tidlegare år, med helikopter og pilot.

– Vi har skifta litt på kven som har tatt nisseoppdraget, så dette er første gong eg flyr nissen. Det blei ein fin tur, seier Geir Nybø om jobben som reinsdyrvikar.

Øvreeide har lang fartstid i Os Aeroklubb og driv samtidig inn på tunet-garden Øvreeide Gard.

– Dette er eit spleiselag mellom klubben, garden og Os Maskin Transport, som er veldig sporty og stiller opp.