Ni osingar til Lesvos for å hjelpa

I privat regi har ein gjeng frå ambulansetenesta og brann- og redningstenesta sidan oktober drive og planlagd ei reise til Lesvos, Hellas, ei av øyene som er hardast ramma av flyktningekrisa.

– Det heile starta med at ein kollega, Lise Mari Systad, ei eldsjel med eit stort hjarte, la ut eit innlegg på Facebook der ho spurde om fleire ville bli med å bidra, fortel ambulansearbeidar Stine Haldorsen Bakke.

Det mangla ikkje på folk som ville delta og no er 27 ambulansearbeidarar og brann- og redningsarbeidarar klare til å reisa sørover.

Av desse er det ni personar frå Os.

Ambulansearbeidarane som reiser frå Os, i tillegg til Bakke, er Erlend Midtun, Tina Valsberg Walløe, Daniel Røen, Aylin Namdal, Egil Johan Hansen og Sindre Johannessen. I tillegg er brann- og redningsarbeidarane Morten Moberg og Magnus Kvalheim Askvik med.

– Eg meldte meg då eg las innlegget om turen på facebooksida til Daniel (Røen), fortel Moberg.

Medics Bergen

Første pulje på 10 personar reiser 18. november, før pulje to med 17 personar, deriblant dei ni osingane, reiser ned 29. november og skal vera der fram til 7. desember.

– Prosjektet har engasjert mange og etterkvart vakse seg så stort at vi såg behovet for å få det i meir organiserte former, seier Bakke.

Dei har no registrert seg i Brønnøysundregisteret og gruppa har valt å kalla seg Medics Bergen.

På spørsmål om kvifor dei har vald å reisa til Lesvos fortel Valsberg Walløe at det er fordi dei har eit stort ønske om å hjelpa.

– Her kan vi bidra med kompetansen vår, ein stad der det er eit enormt behov.

Gruppa understreker at arbeidet deira er reint humanitært og at dei ikkje tar nokre politiske standpunkt.

– Dei roper etter helsepersonell

Hjelpearbeidarane fortel om forferdelege historiar dei har fått høyra frå folk som er på øya.

Dårlege redningsvestar som drar personar ned, fleire forlis, høgare risiko å reisa med båt, som har gjeve lågare prisar og som igjen gjer at det er endå svakare grupper som reiser over, deriblant handikappa personar.

– Tilbakemeldingane vi har fått frå organisasjonar som er til stades er at vi er sårt tiltrengt, dei roper etter helsepersonell der nede.

Kapasiteten på øya er sprengt, dei har rundt 20.000 flyktingar til ei kvar tid, og det på ei øy med berre eit lite lokalsjukehus og ein ambulanse.

– Det kjem meldingar om at det kjem 4000 til 7000 flyktningar i land kvar dag på ei øy med rundt 90.000 innbyggjarar.

Er godt førebudd

Gjengen frå Medics Bergen ser for seg at dei vil drive med akutthjelp. Brann- og redningsarbeidarane kan bidra med overflateredning, medan dei andre kan ta godt imot på land.

– Dei treng nokon som kan skilja kven som er alvorleg skadd og kva type behandling dei ulike treng.

Osingane reknar med at dei kan få nokre tøffe opplevingar, men fortel at dei har lagt planer for korleis dei skal ta best mogleg vare på kvarandre.

– Vi reiser med ein profesjon i ryggen og med ein profesjonell tanke om kva vi må gjera, fortel Midtun.

– Vi er ei samla gruppe og har ei styrke i at vi kjenner kvarandre frå før og vi er flinke til å snakka saman.

Også når dei kjem heim har dei knytt til seg ekspertise som skal stå klar til å ta imot dei.

Betaler primært alt sjølv

Arbeidsgjevarane til dei engasjerte helsearbeidarane har vore støttande til prosjektet og har gjort sitt beste for å legge til rette for dei reisande.

– Og sjølv om dei ikkje kan hjelpa oss økonomisk så støttar dei oss ideologisk.

– Vi betaler primært for reisa vår sjølv, forutan litt støtte vi har fått frå eit fond.

For å få fri til å reise har dei anten brukt av feriedagane sine, bytta vakter eller jobba seg opp timar.

Vil støtta dei lokale

Som ein del av førebuingane til reisa til Lesvos har dei samla inn klede, mat og medisinsk utstyr som dei skal ta med seg.

Dei prøver no å få økonomisk støtte, penger som dei kan bruka der nede når dei ser kva som trengs.

– Dei har eit godt utval i butikkane der nede og vi er då med og støtta dei lokale næringsdrivande som også sårt treng hjelp.

I desse dagar går det ut eit skriv til ulike bedrifter i Os der dei ber om støtte, og gruppa fortel at bedrifter dei allereie har kontakta har vore veldig imøtekommande.

– Om nokon, anten private eller bedrifter, ønsker å bidra så kan dei finna ut meir på sida vår "Medics Bergen" på Facebook.

Fleire og fleire fagpersonell har meldt si interesse om å få reisa ned og bidra, og Medics Bergen planlegg allereie no å sende ei tredje pulje til Lesvos i januar.