- Nett so i gamle dagar
Bildeserie: Ikkje sidan midt på 80-talet har det vore St.Hansfeiring i Vikjo. Torsdagens feiring blei ein suksess.
Bildeserie:
KFUK/KFUM-speidera, Barnas Turlag og Oseana inviterte til St.Hansfest i vikjo torsdag. Det blei ein ubetinga suksess. Så mange som opp mot 1000 små og store fann vegen til vikjo for å vera saman med vener og kjende.
- Dette er nett som i gamledagar då eg var liten gut, fortalde ein av fedrane mellom høgproduksjonen av grillpølser.
Bål og leikar
Speidara hadde ansvaret for bålet. Etter litt plundring og med god hjelp frå speidarvenar i Kolskogen fekk dei etterkvart fyr på bålet.
Samstundes hadde turlaget skipa til leikar oppe på grassletta.
- Vi har ein familiefemkamp kor to og to familiar kjempar mot kvarandre, fortalde Kenneth Herskedal frå turlaget.
Dei fem oppgåvene laga skulle gjennom var tautrekking, sekkeløp, bære vatn i røyr med hol i, potetløp og skokasting.
- Dette er jo veldig bra oppslutning. Eg trur vêret har mykje å seie for at så mange har tatt vegen, meiner Herskedal medan folk kosa seg med pølser, burgerar og anna godt dei hadde med i pikniksekken.
Musikk gav stemning
For å få den rette St.Hansfeiringa stilte Durspelsamskipnaden og Os spelemannslag opp på den provosoriske scena rigga til midt i vikjo. Ein liten dans blei det òg på enkelte.