Netcom med problem i Os

Denne veka har fem ulike osingar fortalt Midtsiden om dårleg mobildekning, ustabilitet og hyppige brot av samtalar.

Felles for dei tre er at dei er kunde hos Netcom eller andre teleselskap som bruker Netcom sine linjer.

– Det har vore problem i to månadar, men dei to siste vekene har det berre blitt verre, fortel Erlend Haukeland.

– Først trudde eg det var noko gale med telefonen min, og dreiv og slo den av og på. Men så merka eg at fleire som eg kjenner byrja å diskutera saka på facebook, at problemet låg hos leverandøren.

Særleg Søre Neset og Nore Neset skal ha vore plaga med dårleg signal.

– Har funne feilen

Då Midtsiden kontakta informasjonsavdelinga til Netcom i dag trengte dei litt tid for å sjekka saka.

Så kom svaret:

– Teknisk avdeling har funne ein alarm på ein basestasjon i området som indikerer at den har ein feil.

– Denne typen feil har vanlegvis ikkje noko å seia for kundane, men datoen alarmen gjekk stemmer godt med datoen kundane byrja å oppleva problem, fortel kommunikasjonsrådgjevar Ellen C. Scheen.

Feilrettingsordre er sendt og Netcom reknar med at det ikkje vil gå lang tid før kundane kan byrja å bruka telefonane som normalt igjen.

– Det sa dei før pinse òg

Haukeland har ikkje tillit til at problemet no blir fiksa.

– Eg har ringt kundesenteret til Netcom sikkert ti gongar. Før helga sa dei at dei venta på nokre delar, at dei skulle ta det over pinse.

– Det er heilt utruleg at dei ikkje forstår kor viktig telefon er for mange. Eg har vore kunde hos Netcom sidan 1994, men no har eg bestilt abonnement hos Telenor. Eg er nok neppe den einaste kunden dei mister i desse dagar.