Nesten klar til bruk
Nye Nore Neset ungdomsskule er ferdig. Berre éin ting manglar.
Bildeserie:
I oktober var det kranselag og i mars kom bruksløyvet (sjå video). Noko prøvebruk av skulen blei det ikkje, men måndag 18. august er alt klart for skulestart på nye Nore Neset ungdomsskule.
– Vi manglar litt dokumentasjon, men skulen er 99 prosent klar. Minst. Det aller meste er sluttført og godkjent, seier prosjektleiar i Os kommune, Tor Inge Døsen.
Rundt skulen ser det også fint ut, men det linjelekre, innhaldsrike skulebygget er ikkje supplert med mykje som appellerer til elevaktivitet utandørs.
Får stor ballbinge
Ungdomsskulen ligg i Skeismyra innanfor Nore Neset skule og idrettsplassen, tett inntil Liafjellet. Vegen er kort til både idrettshallen og kunstgrasbanen, men rundt skulen er det førebels få installasjonar.
– Skal vi halda budsjett så blir det ikkje så mykje utomhus, men det kan vi ta på sikt. Skulen skal stå der lenge.
– Tomta og området rundt består av mykje fint terreng, og på ein planert plass mellom skulen og idrettshallen kjem ein ny ballbinge til ungdomen.
– Bingen er større enn det som er normalt å bygga, 30 x 15 meter, og går alt etter planen er også denne klar til skulestart.
15 klasserom
Totalt blir skulen på 5 500 kvadratmeter med 15 standard klasserom (kvart trinn med fem klasser får kvar sin fløy), praksisrom, grupperom, spesialrom for musikk, kunst- og handverk, mat og helse med fleire.
I kvar av dei tre klasseromsfløyane får lærarane eigne arbeidsrom med plass til 20 lærarar.