Naturen kom på besøk
Kva skjer når ein naturfotograf ikkje kjem seg ut på jakt? Jau, då får han besøk heime.
Bildeserie:
Naturfotograf Oddmund Lunde har mange timar utandørs i løpet av eit år. Den siste tida har han blant anna vore på spekkhoggarsafari i Bjørnafjorden, og på ein lita jakt etter vårteikn.
– Sist veke fann eg den første kvitveisen. Hestehoven har funnet veien opp blant fjorgamalt gras.
– Eit linerlepar trippa i går rundt på plenen og vippa med stjerten. Og på fredag flaug fire låvesvaler over Lysekloster. Saman med klukkande bekker er dette gode vårteikn, fortel Oddmund.
"Skaut" frå terrassen
Søndag skulle han ha seg ein "innedag", få unna litt ulike gjeremål i huset på Riddarhaugen på Lepsøy.
Og kva skjer når ein naturfotograf ikkje kjem seg ut i naturen? Då kjem naturen heim til fotografen.
– Rundt klokka fire om ettermiddagen kom ein rev tuslande borte i skråningen utanfor stovevindauget. Dermed var det berre å finna fram teleobjektivet og skyta frå terrassen.
– Som om ikkje dette var nok, så dukka det litt seinare opp ei velvaksen havørn som slo seg ned i eit furutre rett over der reven nett hadde gått forbi, fortel Oddmund, og sender oss nokre bilde av vårteikna og gjestane som prøvde å lokka han utandørs denne vindfulle søndagen.