Nasking, høg fart og steinkasting
Ein gut blei tatt for å stela snus, ein mann fekk tilsnakk for høg fart og ein familie på Hjelle fekk ruta til gjesterommet knust av stein.
Torsdag i 15-tida fekk politiet melding om nasking ved ein butikk på Amfisenteret.
– Ein 14 år gamal gut blei tatt for å stela snus. Vi kjørte han heim og fekk ein prat med foreldra.
– Guten er meldt og det er rutinemessig sendt varsel til barnevernet, opplyser politibetjent Rune Fimreite.
Tilsnakk etter høg fart
Klokka 14.45 i går observerte politiet ein bil som heldt høg fart opp Mobergsbakken.
Politiet følgte etter bilen, men tok den ikkje igjen før bilen sto parkert utanfor heime til føraren, ein mann i slutten av 20-åra.
– Sidan vi ikkje hadde måling av farten så fekk han berre tilsnakk. Men hendinga er loggført, så om det skjer noko liknande igjen stiller føraren svakare.
Kven kasta steinen?
Torsdag i 19-tida høyrde ein familie på Hjelle eit brak i det eine vindauget.
– Ein stein på storleik med ein knyttneve hadde blitt kasta i vindauget til gjesterommet deira.
– Det ytste av to lag blei knust og dette var naturlegvis ei ubehageleg oppleving, seier politibetjent Thorvald August Bye.
– Dette kan sjå ut som gutestrekar så foreldre i nabolaget kan kanskje ta ein prat med ungane sine, og om dei vil gjera opp for seg og få dette ut av verda så er det berre til å ta kontakt med oss eller huseigar.
111 lovlydige
Frå klokka 14.20 torsdag hadde politiet kontroll i Hjellemarka ved Storestraumen på Søfteland.
– Vi kontrollerte trafikken frå by'n til Os, til saman 111 bilar.
– Vi fann ingenting å reagera på, så det var positivt, seier Fimreite.
Kjenning med to syklar
I 19.30-tida møtte patruljen ein kjenning av politiet, med to syklar.
– Han hadde ei grei forklaring og syklane blei sett på som av så låg verdi at han fekk sykla vidare.