Når alt blir musikk

Olav Skorpen var 16 år og gjekk i Join Us då Eirik Strønen Søfteland blei fødd. I dag er aldersforskjellen utjamna og dei to multimusikalske kameratane deler både skills og interesser.

Eldstemann er best på bass, Eirik på trommer. Men du blir nok ikkje skuffa om du ber dei spela på trompet, saksofon, toradar, munnspel, piano eller gitar heller.

– Kor flinke vi er på andre instrument enn det som er hovudinstrumentet vårt kan diskuterast. Men vi er begge ivrige etter å spela alt mogleg, seier Olav.

Mens andre ser på fotball

Begge har vakse opp i musikalske heimar, begge har vore innom ulike band og konstellasjonar, frå kristent ungdomskor og kulturskulearrangement til rockegrupper og rølpegrupper. Dei spelte blant anna saman i band med fenomenet Bjørn Hellfuck.

Ved sidan av felles bakgrunn og interesse er dei like glade i avsporingar, å lytta til musikk mens dei sjølv sit med kva som helst av instrument i nevane.

– Vi er glade i å prøva oss fram, finna låtar og delar av låtar og prøva å spela dei på ulike instrument, seier Eirik.

I motsetndad til Olav liker Eirik å sjå fotball på TV. Men når dei to er saman er det youtube og ikkje tv det går i. Dei ramlar innom alt frå eldgamal jazz til flett ny rock.

Idol, 11/11 og ein biltur

Det var Olav som meldte Eirik på Idol. Olav hadde teft, den 16 år yngre kameraten kom som kjent til finalen.

I intervju med Midtsiden, mens Eirik var i innleiande rundar, fortalte Olav kor mykje tru han hadde på kameraten. «Han er utruleg musikalsk», sa Skorpen, og sendte oss denne videoen frå ein tilfeldig biltur mellom Bergen og Os.

Dei to hadde i forkant ein morosam konsert 11.11.11. For å markera datoen. I Elvebakken. Video frå den konserten finn du her.

Med Jens på Catten

Olav og Eirik har spelt saman i ulike band, blant anna King Calling. Eirik held på å spela inn si første soloplate, som truleg kjem ut til hausten, og er heller ikkje langt unna med eit album med bandet Grace & Menace (tidlegare The Beauty).

– Men det er ikkje meg det handlar om på fredag, det er tre kameratar og eit knippe coverlåtar, seier Eirik.

Om du vil varma deg opp til konserten kan du på vorspiel sjå Eirik mot Gina Aspenes i Beat for Beat på NRK.

Tredjemann er bandkamerat frå Grace & Menace, Jens Erik Aasmundseth, også kjent som trommis i Major Parkinson.

– Kor høg er risikoen for leik, sidespor og halvkveda viser på fredag, får folk høyra ei heil låt om dei kjem på Catten?

– He, he! Eg forstår at du spør, men ja, Jens held styringa. Vi skal fullføra det meste, seier dei to.

Setlista er lang og ikkje ferdigutkryssa, men Eirik, Olav og Jens kan nærmast garantera at dei vil by på låtar frå blant andre Bruno Mars, The Beatles, Daft Punk og Creedence på Catten til helga.