Nær treft av tre
Råttent tre fall ned berre meter framfor barnevognene. – Hadde vi ikkje stoppa for å prata, kunne det ha treft oss, fortel Hilde Kristine Søfteland.
Dei to venninnene Hilde Kristine Søfteland og Mariell Halhjem har gjort det til ein vane å leggja den daglege trilleturen på gangvegen langs ved Mobergslia. Fredag kunne det gått skikkeleg gale.
– Vi gjekk den vanlege ruta som vi går kvar dag, då eit tre plutseleg ramla ned rett framfor oss.
– Hadde det ikkje vore for at vi gjekk roleg og prata så kunne fort vi eller ungane, som låg i vogna, blitt treft, fortel ei uroa Hilde Kristine Søfteland.
Ho håper no at nokon kan gjerna noko for å sikre skråningen slik at ikkje dei, eller andre, opplever det same igjen.
– Treet blei løfta ut av gangvegen av nokre syklistar som ville ha fri bane, seier Søfteland.
Ikkje berre å høgga
Oppsynsmann Jan Terje Lund i Os kommune fortel at det ikkje er så enkelt.
– No veit eg ikkje nøyaktig kor dette skjedde, men delar av skråningen i Mobergslia er verna.
– Om hendinga skjedde innan dette området er det ikkje berre å felle trea, då dei er verna gjennom lova sjølv om dei byrjer å bli rotne, forklarar Lund.
Han ville umiddelbart ta ein tur for å sjå kor det skjedde og kva som eventuelt kunne gjerast.