Naboar føler seg lurt

I går fortalte vi om lemstova frå Tveit som blir reist på Lyngheim, men som viser seg å bli nesten 1 meter høgare enn det som er godkjent.

Les òg: Rask, men høg reisning

Initiativtakar til tunet, Nils Georg Brekke, fortel om feilmåling og beklager den auka høgda, men håper på godkjenning av ny søknad frå ABO plan og arkitektur.

ABO vil søkja om løyve med endra byggehøgde, 1 meter høgare enn det som er godkjent.

Varsla tidleg

Midtsiden har vore i dialog med ein av naboane til tunet, og han fortel at stemninga blant naboane som ligg bak lemstova ikkje er god.

– Først kom melding om at tunet måtte flyttast, for det skulle byggast på gamlemåten, derfor kunne det ikkje sprengast i fjell.

– Då fekk dei flytta det 4 meter nærmare husa våre og bygga det 30 centimeter høgare, fortel Arne Ingebrigtsen.

– I januar såg vi at grunnmuren/sålen såg ut til å vera for høg og fekk rett, den var drygt 15 centimeter høgare enn den skulle vera. Den gong fekk vi beskjed om at det kunne koma nokre avvik, men at dei skulle prøva å landa på godkjent kotehøgd.

– Og så skjer det motsette, yttarlegare 70 centimeter opp.

– Tar seg til rette

Bygget blir 4 meter nærmare og, om dei får godkjenning for nok 1 meter opp, rundt 120 centimeter høgare enn det som var planen då Ingebrigtsen kjøpte tomt og hus på Lyngheim.

– Dei kan gjerne seia at dei ikkje visste om det, men dei bør følgja med når dei visste at sålen var for høg, det tar berre 5 minutt å måla høgda.

– Dette er å ta seg til rette, eg har inntrykk av at dei durar på for å få tilgjeving etterpå. Sjølv om det sikkert er ei god sak og bygginga skjer på dugnad så synes eg at dei må følgja spelereglane sånn vi andre må.

– Eg ser også at det er langt meir enn dei to godkjente handikap-parkeringsplassane som er i bruk, det neste er vel at dei søkjer om utvida parkeringsplass.

Ingebrigtsen er også overraska over at ABO som søkjar ikkje har følgt betre opp etter at dei i januar blei gjort merksam på at grunnmuren var for høg.

Vil kjempa for utsikta

Arne Ingebrigtsen er frå Malkenes og frå terrassen på Lyngheim kunne han sjå fyret på Malkenes. No når lemstova har reist seg er fyret og resten av fjorden skjult.

– Vi har brukt ein del pengar på å f�� oss hus her inne og synes ikkje det er rett at vi skal få ei så vesentleg endring av utsikta vår.

– Vi og fleire andre naboar er klare for å kjempa for at lemstova blir senka. På ein eller annan måte må dei klara å bygga det lågare, og viss ikkje kommunen seier at nok er nok så tar vi saka vidare til fylkesmannen.