Myrkdalen doblar kapasiteten
Søndag er den første snøen venta, i slutten av november opnar Myrkdalen Fjellandsby ein stor, ny ekspressheis og fire nye løyper.
Myrkdalen, som i haust kom med heilt ny profil og har gått over frå namnet Voss Fjellandsby til konsekvent å bruka Myrkdalen Fjellandsby, utvidar før starten på skisesongen.
Eigarane, Schage Eigedom AS (54%), Grendahl Holding AS (36%) og Aurland Ressursutvikling AS (10%), investerer 60 millionar kroner i ein ny, moderne 6-seters ekspressheis.
Både Sparebanken Vest og Innovasjon Norge har bidrege i heisfinansieringa.
Fire nye løyper
– Det blir fire nye løyper frå den nye heisen, i nytt, spennande terreng. Eit større laussnø-område opnar seg òg, i tillegg til at vi lager ei ny barneløype til vinteren, seier John Ivar Norheim, dagleg leiar i Myrkdalen Fjellheiser.
Den nye heisen får namnet Storhaugsekspressen og blir 1,7 kilometer lang og tar deg opp 440 høgdemeter.
Blant dei fire nye løypene, der minst tre av dei skal opna i år, er det både svarte, raude/blå og grøne.
Heisen får ein kapasitet på 2600 gjestar i timen, noko som utgjer nær ei dobling av den totale kapasiteten i området.
Sesongstart i november
Søndag og dei første dagane i neste veke er det meldt snø i Myrkdalen.
Men det er framleis nokre veker til sesongstart.
Ifølgje heimesidene til Myrkdalen har dei mål om å opna heisane i slutten av november.