– Mykje tyder på at ungdomar har opphalde seg i huset

Politiet var tidlegare denne veka på Ferstadvollen på Bjørnen etter tips.

– Vi sjekka eit hus som står til nedfalls, fortel politibetjent Morten Haugland.

Han fortel at politiet har fått opplysingar om at ungdomar har tatt seg inn i huset og brukt det til opphaldsplass.

– Då vi undersøkte fann vi spor av at det har vore folk inni huset. Eit vindauge var knust, truleg for å koma seg inn.

Haugland fortel at det blei funnen tomgods frå alkohol, og at det er mykje som tydar på at det er ungdomar som har vore der.

Akkurat kor tid dei har vore der er uvisst.

– Vi har sperra av vindauget og varsla eigaren av bygget, seier Haugland.

Eigaren vil sjølv syta for yttarlegare sperring, slik at det ikkje skal vera mogleg å ta seg inn i huset.

Haugland fortel at eigaren vil melda skadeverk og innbrot, og at politiet har sikra bevis og dokumentasjon frå staden.

– Snakk med ungdommen

I det siste har politiet i Bjørnafjorden fått informasjon om at ungdommar oppheld seg også i ubebudde hus andre stadar i bygda.

– Vi oppfordrar foreldre å snakka med ungdomane sine, seier Haugland.

Han fortel at det kan vera farleg å ta seg inn i hus som står til nedfall.

– Vi kjenner ikkje tilstanden på husa, og det er usikkert om det er trygt å bevega seg inne.

Han fortel at det òg kan vera dårleg inneklima grunna fuktskadar, eller dårleg bygningsmasse.

– Vi har sett at det har blitt tent opp faklar og lys, i tillegg til at det er spor av at det er fyrt i peisen, seier Haugland, og legg til at det er stor fare for at det kan oppstå brann.

Oppfordring til huseigarar

Politiet kjem òg med ei oppfordring til huseigarar som har bygningar som står tomme og i dårleg stand.

– Undersøk bygningane de eig.

Ei vidare oppfordring er å gjera tryggleikstiltak.

– Gjer tilstrekklege avsperringar slik at uvedkommande ikkje kan ta seg inn i bygningen, avsluttar Haugland.