Mykje sprell på moloen
Niklas var ein av fleire som fekk fisk med fiskelaget torsdag ettermiddag. Onsdag står Oselvo for tur.
Bildeserie:
I går hadde Os Jakt og Fiskelag årets «Fiskesommer»-arrangement på moloen ved Oseana.
Over ti ungar møtte fram, og fleire fekk fisk. Stille fjord, lite nedbør og godt oppmøte gjorde arrangørane nøgd.
– Dette var veldig kjekt! No håper vi å få med oss ein god gjeng i Oselvo på onsdag, seier leiar for ungdomsutvalet i laget, Remi Lindborg.
Blant dei som møtte fram i går var Hilde Boge Andersen, tidlegare styremedlem i jakt- og fiskelaget både Os og på fylkesnivå. Det var Hilde som leia kurset der Remi som ungdom blei hekta på fiske.
• Les òg: Verdien av å ha det spennande utandørs
Dei vaksne som var med var minst like ivrige, både fedre, mødre og besteforeldre.
På kroken beit det både makrell og lyr, og etterpå fekk fleire av ungane vera med og sløya fisken.
– Ungane imponerte meg. Ei ung jente ba om å få kniven for å prøva. Det er fint når ungane i tidleg alder lærer kvar maten kjem frå, seier Per Egil Størksen.