Mykje jubel i Lysefjorden
Bildeserie: Dei siste tre dagane har 80 fotballag leika seg i regn og strålande sol i Framo Lysekloster idrettspark.
Bildeserie:
Frå fredag til søndag har årets Lysekloster Cup blitt arrangert.
– Sjuarkampane gjekk fredag kveld og laurdag fram til klokka 12, så var det femmarfotball ut dagen og heile dagen i dag, fortel cupansvarleg Tomas Fiksdal.
Cupen er for spelarar frå 2. til 7. klasse, 7 til 12 år, og held seg stabilt på rundt 80 påmeldte lag.
– Dessverre var det litt få jentelag, to årstrinn utgjekk, to andre blei slått saman så vi fekk nok kampar.
Kjekke og flinke dommarar
– Med frihelg for A-laget har vi hatt ekstra god hjelp på dommarsida.
– Saman med seniorane har vi hatt med oss gutar 14 på dugnad, og eg ser at det er kjekt for desse yngste å vera på feltet med både ungdomane og heltane frå 2. divisjon.
Fekk bruk for taket på tribunen
Søndag var det skyfri himmel, fin temperatur og nesten ikkje vind i Os.
Laurdag var det nokre voldsomme regnbyger.
– Det regna også fredag kveld, men med lett regn og flomlysa på blei det nesten magisk stemning her. Tribunen med tak var endå betre å ha i går, men det gjekk heilt fint denne dagen òg.
Lysekloster har to kioskar, noko som òg kom godt med når spelarar, søsken, foreldre og besteforeldre ville ha påfyll av energi.