Møt SV sin toppkandidat

Midtsiden har utfordra ordførarkandidatane i dei ni partia som stiller lister ved kommunevalet i Os på det vi meiner vil vera sentrale områder dei kommande fire åra. I ein serie artiklar vil kvar av ordførarkandidatane få presentera sitt syn på dei ulike emna.

Møt ordførarkandidat frå SV: Oddne Bjørnør Horg og les hans syn på dei viktige områda - barnehagar, skule, eldreomsorg, utbygging og areal, samferdsel/trafikk/veg, frivilligheiten, arbeidsplassar/næringsliv, kommunen sin økonomi og kor Os er om 15 år.

Barnehagar

I Os kommune er det i dag 19 barnehager, kor to er kommunalt drivne og 17 private. Det er nett no ein overkapasitet på barnehageområdet.

– Det er positivt at det er full barnehagedekning, men vi i Os SV vil rekommunalisera så mange barnehagar som vi har midler til. Det vil gje oss betre kontroll over drifta. Det at barnehagelova opnar for at private eigarar kan ta utbytte tykkjer vi ikkje noko om. Dette er midler som heller kunne vore brukt til drift.

– Vi vil òg avslutta ordninga med kommunal kontantstøtte og i staden bruke det på å styrka barnehagane, seier Horg.

Skulane

Os kommune har 10 barneskular og 2 ungdomsskular.

– Vi hadde nettopp vitjing frå partileiar Audun Lysbakken som var med til Hegglandsdalen barneskule. Der snakka vi mellomanna om leksefri skule.

– Os SV ønsker eit forsøksprosjekt på dette kor ei i staden for heimelekser gjer øvingsarbeidet på skulen. Då kan ein få kyndig hjelp for pedagogisk personale og betre hjelp til oppgåvene. Møllenpris skule i Bergen har starta eit tilsvarande forsøksprosjekt, noko vi er veldig positive til.

– Vi ønskjer òg i så stor grad som mogleg å behalde nærskulen der det lar seg gjera og ikkje minst trygga skulevegen til alle skulene i Os.

– Men noko av det viktigaste er eit kontinuerleg vedlikehald av skulebygga. No har det vore ei storsatsing i det siste, men den kjem av manglande innsats over fleire år. Vi vil heller ha eit løpande vedlikehald i staden for tyngre grep i ei kort periode.

Eldreomsorga

Som på barnehageområdet ønskjer SV å rekommunalisera eldreomsorga.

– Andre etasjen på Luranetunet er framleis på anbod, sjølv om det var kommunen som vann den siste runden. Det vil vi ha slutt på. Vi meiner det blir meir forutsigbart med kommunen heile vegen. Generelt er eg skeptisk til konkurranseutsetting. Det gjer ofte at tilbyderane kuttar i kvaliteten på det dei leverar eller i løns- og pensjonsvilkåra til dei som skal gjera jobben.

– Vi vil òg gjeninnføra kjøkkenet på Luranetunet i staden for at bebuarane og brukarane skal få vakumpakka mat.

– Det viktigste for oss er at eldreomsorga blir kommunal. Det vil gje ein betre arbeidskvardag for dei tilsette og eit bedre tilbod for bebuarane. Vi vil auka grunnbemanninga og gje dei tilsette betre moglegheit til å disponera arbeidsdagen sin, slik at dei kan nytta fagleg skjønn i staden for skjema og stoppeklokke.

Utbygging/Areal

Os er ei vekstkommune, noko som legg press på nye områder for bustadbygging og næringsutvikling.

– Vi må få til ein større variasjon i bustadane som byggast. Det må bli mogleg for ungdom å etablera seg.

– Vi vil at bygginga skal skje i områder med eksisterande infrastruktur og at kommunen er tydelegare på, og held seg til, rekkefølgjekrava. Ta Bjånesutbygginga som eit døme, kor ein allereie har gitt dispensasjon frå desse. Det er viktig at ein har ein fungerande infrastruktur før ein går i gang, meiner Horg, som vil at ein skal ta særleg omsyn til biologisk mangfald, naturområder og matjord når ein finn nye områder for utbygging.

Samferdsel/trafikk/veg

– Trygge skuleveger er det viktigste! Vi i SV ønskjer generelt meir satsing på dei mjuke trafikantane ved å legga til rette for gang- og sykkelvegar.

– Når det gjeld Fergefri E39, så er vi generelt skeptiske. Det er eit prosjekt med høge kostnader og begrensa goder. Vi vil heller ruste opp fergjeflåten og utbedre smale dårlege vestlandsveger. Tildømes ved å rassikra E16 mellom Bergen og Voss.

Frivilligheiten

Os har eit aktivt lags- og organisasjonsliv både innan idrett, kultur og på andre områder.

– Vi er veldig positive til frivilligheiten. Kommunen si oppgåve er å gje gode rammevilkår. Vi er òg positive til å slippe frivilligheiten inn i eldreomsorga, men ein må passa på at det ikkje blir ei kommersialisering kor nokon skal henta ut gevinster. Samarbeid med frivillige er ikkje eit problem, men det er framleis kommunen si oppgåve å drifte kjerneoppgåvene. Det må ikkje bli slik at ein lener seg på frivilligheiten for å få løyst disse.

Arbeidsplassar/næringsliv

Mange av dei som bur i Os i dag pendlar ut av kommunen for å jobba.

– Det er eit problem. Vi må freiste å etablera fleire arbeidsplassar lokalt. Det er eit pluss for miljøet og for kommunen som heilskap. Sannsynlegvis vil fleire jobba i kommunen når Lyseparken blir operativ.

– Samstundes så er det begrensa kva vi kan gjera politisk. Mykje handlar om marknaden, men vi må sørgje for å etablera gode rammevilkår, kanskje gjennom tilskot til miljøretta og framtidsrettende næringer. Det vil gje arbeidsplassar som vil vera der over tid. Olja vil bli fasa ut før eller seinere. De må vi bu oss på, seier Horg.

Kommunen sin økonomi

– Det er positivt at ein har klart å skapa eit overskot, men kommunen sin økonomi må vera forutsigbar og stabil. Eg er skeptisk til investeringane i aksjemarknaden.

– Os SV har òg programfesta at vi vil innføra eigedomsskatt. Det vil gje forutsigbarheit. Men den må ha ein klar sosial profil med ikkje for høge satser og eit relativt høg bunnfradrag. Gjer vi det, så gjer vi oss mindre avhengig av gode tider i aksjemarkedet, meiner Horg.

Os om 15 år

Avslutningsvis har vi utfordra ordførarkandidatane til å sjå inn i glasskula og "spå" kor Os er om 15 år.

– Då er Os godt fungerande med offentlege tenester som leverer gode velferdstenester. Vi har ei kommune som har respekt for og byr seg om sine tilsette. Dei har gode arbeidsvilkår og vi har tatt klimautfordringane på alvor også lokalt. Vi har tatt vare på den vakre naturen vår gjennom gjennomtenkt utbygging i tråd med naturen sin bæreevne.

– Os har held fram med å vekse, trur Horg.

– Eg må få lov til å legga til ein ting om den debatten som går om flyktningene frå Syria. Os må ta eindel av ansvaret og busette det talet IMDI foreslår. Det er eg heilt trygg på at Os skal klare. Osingane er åpne og inkluderende, så eg er trygg på at vi skal inkludere dei slik at dei får gode vilkår for eit godt liv, avsluttar SV sin ordførarkandidat, Oddne Bjørnør Horg.