Misvisande og stygt av BT

Sjå der! Vestlandets storavis, regionsavisa Bergens Tidende, har tatt turen til Os og Oseana! Ikkje side opp og side ned om Rihanna, Bruce Springsteen og Koengen denne gong, no skal vi kjøra 30 minutt med bil til nabobygda!

Oseana er det største kulturhuset i Hordaland etter Grieghallen, endeleg, 2,5 år etter opningsfesten, ser BT nærmare på kulturlivet i Os.

Eller?

Fredag slo BT opp over mesteparten av framsida eit bilde av Oseana med teksten:

To festivaler er nedlagt, ungdom mister tilbud og swingklubben sliter. Lokalkulturen skylder på Oseana.

Inne i avisa blei det følgt opp med ei dobbeltside som handlar om aksjonsgruppa Bevar Fjellheim, om Osøren Blues & Jazzfestival, filmfestivalen 61 grader nord og Os Swingklubb (!), om korleis kulturlivet i Os slit etter at Oseana kom og Fjellheim blei stengt.

De frykter at den lokale kulturinteressen dør ut.

Stemmer dette?

Eg tar for meg bodbringaren først:

Det er kjekt å driva kritisk journalistikk. Då kjenner vi at vi gjer jobben vår, då kan vi få respekt. Men det er tryggast å ramma dei store og sterke, dei som styrer, dei som har pengar, dei som har fine hus. Då treng du ikkje trø så varsamt.

Men først må du vel sjekka om dei fortener det, spesielt når du slår med slegge, i eit terreng du ikkje kjenner. Å hamna på framsida av BT er stort for mange.

Ver varsam-plakaten gjeld også når du kritiserer det offentlege, eit større firma eller ein direktør, i alle organisasjonar finnest det flinke folk som jobbar hardt, i beste tru og meining, og som fortener rettvis framstilling, ei framstilling i balanse.

Har Bergens Tidende funne kjeldene sine sjølv? Eg håper verkeleg at dei ikkje har fått dei servert av ei aksjonsgruppe. Har BT, når dei går så hardt ut, løfta mange steinar for å sjå om påstandane held vatn? No skal ikkje ei lokalavis ta BT i lære, men du kan ikkje slå så hardt du vil berre fordi du slår oppover.

Så har vi festivalane. Er Oseana årsaka til at dei er lagt ned?

Osøren Blues & Jazzfestival har gjort den siste helga i juni til ein folkefest, år etter år, sidan 1999. Frå små spelestadar til noko litt større i Fjellheim, og seinare med Vognhallen og Oseana som storscenen under festivalen. I Oseana fekk dei ikkje selja ølet sjølv. Men det visste dei vel på førehand? Og så er det alltid litt risiko knytt dei større namna, som årets hovudtrekkplaster, amerikanaren Johnny Winter, som ikkje levde opp til styret sine forventingar i år.

Men har festivalen si nedlegging noko med Oseana å gjera? Kunne ikkje blues- og jazzfestivalen klart seg med dei mindre spelestadane, som Peppes, MS Midthordland og Oselvarnaustet? Eller kjørt noko utandørs, som "Bergens Beste" festival, Søfteland Rock N LOL. Eller prøvd seg på eit sikrare kort enn 71 år gamle Winter då det skulle satsast i Oseana?

Filmfestivalen. Kvar skal eg byrja?

Den vesle festivalen som blei starta som ramme rundt éin film, ein amatørfilm arrangørane hadde laga sjølv, som eit morosamt stunt, men ein festival som med åra framsto som både stilig, sjarmerande og delvis litt proff. Heilt gratis. I Fjellheim.

Så skulle den, med nye drivarar, få nytt namn og halda fram i sjølvaste Oseana. Imponerande! Ei helg, sa du? Nei. Ei god veke! Dei leigde "Vetle-Grieghallen" frå helg til helg! Eit bransjetreff i vesle Os.

Eit fantastisk program, ei festivalavis som var tre gongar så tjukk som messeavisa til Dra til Sjøs, båtmessa i Bergen som dreg 20.000 gjestar, og ein staseleg galla med den gong The Voice-aktuelle Shaun Bartlett på scenen. Arrangørane fleska til.

Kven skulle fylla Oseana desse dagane? Bransjefolk? Eller skulle Os sine innbyggarar gå på kino kvar dag i over ei veke? Dette lukta risiko lang veg.

Os Swingklubb sliter visst også.

Det visste eg ikkje. Dei eg kjenner i swingklubben er alltid strålande blide, og klubben ser ut til å dukka opp over alt, med oppvising på Vårsleppet, Marknadsdagane, på Fritt og Vilt-messa i Bergen, med staselege festar (i Oseana). Det er naturlegvis trist om dei slit. Men kva slit dei med? Kor mange medlemmar har dei mista? Korleis gjekk det med Bergen Swingklubb då Grieghallen opna?

Er dette dei viktigaste og beste kjeldene på kulturlivet i Os, BT? To festivalar som la seg sjølv ned og ein danseklubb?

Kva med å snakka med Os Musikkforening og Os og Kuventræ Skulekorps? Som har hatt så mange strålande konsertar i Oseana, også publikumsmessig. Eller Fonos, som har selt fleire billettar til julekonserten sin i år enn kva Lill Lindfors har til hennar konsert i november?

Det er ikkje sikkert at desse er dei beste kjeldene heller. Eg kjenner Os godt, men er likevel usikker. Derfor ville eg ha sjekka med endå fleire. Katastrofeoppslag krev betre ryggdekning enn dette!

Så kjem vi til aksjonsgruppa Bevar Fjellheim.

Eg har ikkje noko imot at Fjellheim får stå, viss det blir resultatet av aksjonen. Eg var faktisk litt overraska over at eit samstemt (!) kommunestyre gjekk inn for sal av det kulturhistoriske bygget. 10 millioner kroner var målet å få for eigedomen. Inntektene var del av finansieringsplanen til Oseana.

Aksjonsgruppa har nyleg fått møte med varaordførar og ordførar for å legga fram nesten 4000 underskrifter og ei skisse til korleis dei vil driva Fjellheim. Dei vil ha ei prøvetid på tre år.

Og så, to veker etter eit positivt møte med kommunen, kjem denne saka i BT.

Om gårsdagens oppslag gagnar saka til Bevar Fjellheim gjenstår å sjå.

Men om nokon hadde kome på døra mi for å be om pengar og medvind, samtidig som dei sto og ripa opp bilen min med kniv, så hadde dei ikkje gått i pluss den dagen, det kan eg garantera.

Eg forstår at det er mange som saknar noko av det Fjellheim hadde. Ikkje berre fordi dei har gode minne frå bygget, men fordi det i storleik og og funksjon blei Os sentrum sitt ungdomshus, samtidig som det fram til 2011 var storstova vår.

Alt er ikkje perfekt med Oseana. I tillegg til at dei i etterkant har måtta bygga vindauge til kulturskulen og toalett i foajé-etasjen, kunne fleire ting ha vore betre. Kanskje med ein scene til, i ein mindre sal, som eit Fjellheim i Oseana. Kanskje med servering også i foajeen, ein restaurant som ikkje stenger klokka 16.30 i sommarferien, når krye osingar kjem med gjestar for å spandera middag ved fjorden. Dialogen med lokale aktørar kunne kanskje også vore betre og inkludert endå fleire. Dei kunne variert programmet litt meir, ikkje kjørt Vamp og Bjørn Eidsvåg to år på rad. Samtidig har dei eit ansvar for å få ting til å gå rundt.

Men oppslaget fredag er ikkje balansert!

Kva med alle dei store laga som i dag kjører vellykka arrangement i Oseana? Det er ingen som har snakka med dei? Eller elevane ved den skulen i Os med flest elevar, Os kulturskule, som (etterkvart, då vindauga kom på plass) har fått så fantastiske forhold (har BT sett dansesalen)? Og korps og kor som kan halda konsertar i slike omgjevnadar?

Har BT sjekka stemninga hos skulelevar som har deltatt i show på Oseana? Kor stolt dei er når dei er del av noko så stort, når dei får stå på denne scenen?

Publikummet i Os, som får fleire store namn i heimbygda på éin månad no, enn dei gjorde per år før Oseana opna, takkar for tilbodet med svært god oppslutnad. Osingane kjem seg opp av sofaen meir enn før. Interessa for kultur er neppe i ferd med å dø ut.

I denne saka er det fleire organisasjonar som har hjelpt BT å teikna noko eg meiner er eit feil og urettvist bilde av Os og Oseana.

Det er trist. Så mange dyktige og hyggelege folk som er intervjua, og så blir det eit resultat ingen av dei kan vera nøgd med, heller ikkje dei i BT som bestemte seg for å skyta med kanon, når dei hadde så dårleg krut.

Kjetil Vasby Bruarøy
Redaktør, Midtsiden.no