Mikkelsen skåra frå 35 meter - nysignerte Dahl putta to
Kapteinen med fulltreffar i god treningskamp mot Stord.
– E' da nåken som har sagt 35 meter, det var no nærmare 40, seier Marius Haugland Mikkelsen muntert etter treningskamp mot Stord på bortebane fredag kveld.
Os vann 4-0. Mikkelsen sendte Os i føringa på eit langskot via tverrligger tidleg i andre omgang.
– Eg spelte midtstoppar og sto høgt. Så fekk eg ei draumepasning av Torkel Hjertnes, du kan nesten kalla den ferdigskåra, held Marius fram.
Han fortel at begge lag hadde store sjansar i første omgang, men at Os hadde eit visst overtak. Etter pause byrja måla å koma.
Tilbake frå skade
Kapteinen braut foten i siste treningskamp før starten på halv serie etter sommaren 2021. I trening før jul knakk han foten éin gong til på same stad.
– Eg spelte nesten 80 minutt i første NM-kvalik og heile kampen i går. Det kjennest greit ut, og det var kjekt med ei god gjennomkøyring mot Stord.
– No er vi klare for NM-kvalik mot Lysekloster neste helg!
God historikk
Os vann 3-2 over Stord i serien i haust, og møter også Stord i årets sesong.
Mikkelsen skåra 12 mål på 14 kampar då Os var nedom 4. divisjon i 2018.
To år før blei det 15 mål på 27 kampar, i 2019 skåra han 5 mål på 22 kampar.
Han var ikkje den einaste goalgettaren på banen i går.
Stord - Os 0-4 (0-0)
Målskårarar: 0-1 Marius Haugland Mikkelsen, 0-2 og 0-3 Mathias Aastvedt Dahl og 0-4 Roger Blokhus Ekeleland.
– Mathias hadde ein kjempekamp i sin første for Os, med to mål og assist på Roger si skåring på slutten, fortel Mikkelsen.
Mathias Aastvedt Dahl har vakse opp i Åkra, skåra 5 mål på 7 kampar for Haugesund U20 då 3. divisjon hadde koronapause i 2020 og er no på utlån frå Øygarden til Os.
Os-laget som starta mot Stord: Kasper Færøvik - Torgeir Lunde, Marius Mikkelsen, Sverre Spangelo Haga - Mathias Dahl, Rune Mo, Sebastian Plätzer, Thomas Spilde - Niklas Lunde Fosen, Henrik Tysse Sperrevik og Roger Ekeland.
Innbytarar med speletid: Jonathan Mjånes Lund, Martin Hunnes, Vebjørn Haga, Magnus Spangelo Haga og Torkel Hjertnes.
Os speler andre NM-kvalik borte mot Lysekloster laurdag om ei veke. Kampstart er 15.00.
Seriestart er for Os sin del på heimebane mot Frøya laurdag 9.april.
