Midt i blinken på første forsøk
Adelheid Røttingen Møller (9) debuterte på skytebanen i Fana og sette ny personleg rekord under Os-stevnet.
Bildeserie:
I førre veke fortalte Os Skyttarlag om auka rekruttering og gode resultat blant ungdomen. I helga fekk fleire av dei vist seg fram på heimebane.
Ei av dei unge, ferske skyttarane er Adelheid Røttingen Møller, som fyller 10 år i desember.
– Mitt første stemne var i Fana på torsdag. I dag skaut eg endå betre, sa Adelheid etter å ha skote på heimebane på Ulven søndag.
Då betra ho seg frå debuten og sette ny bestenotering med 234 poeng på 25 teljande skot på 100 meter.
Søstrene Evensen
Adelheid langt frå den einaste jenta på skytebanen. Tre av dei andre er søstrene Amalie, Sofie og Maren Evensen.
Sofie blei, med 345, den beste osingen på Os-stevnet, saman med V65 Reidar Dahle, som også tok 4. plass.
– Hadde Sofie vore litt flinkare å skru siktet så hadde ho vore heilt i tet, hadde Reidar unngått den eine niaren på nest siste skot så hadde han tatt nok ein suveren siger, seier Anstein Eidsvik frå Os Skyttarlag.
Denne veka har Sofie si søster Amalie slått både Reidar og Steinar Eidsvik og tatt 10-meterspokalen, skriv Os Skyttarlag på sine heimsider.
Reiste frå bygd til bygd
Det var ei hektisk langhelg med skyting, då fleire skyttarar reiste mellom Os, Fana, Voss og Granvin. Fleire skaut både i Os og Fana, tre deltok på Voss og Granvin og tre osingar tok turen til noregscup i Trondheim.
På Voss tok Reidar sigeren i V65 med 350 for andre gong på to dagar.Reidar vann også i Fana i tillegg til at han var nær sigeren på heimebane.
I noregscupen var det Øystein Haugland, Geir Wiggo Dale og Jan Kristian Evenesen som tok turen. Det ble ingen topp-plassering, men ein del gode resultat med Geir Wiggo og Øystein med 342 på Byneset som dei beste.
Vinnarane
På Os-stevnte var det desse som vann:
KL.3-5 John Olav Ågotnes, Sartor 347
Kl.V55 Harald Grytås, Osterøy 347
Kl.V65 Johannes Skaar Bakke, Strandebarm 350
Kl. V73 Nils Lysen, Tørvikbygd 350
Kl. R Sander Svartemyr Virkesdal, Oppedal/Brekke 348
Kl ER Kristian Haugsdal Asheim, Oppedal/Brekke 350
Kl. J Oda Innvær, Bremnes 349
Kl. 1 Geir E Medaas, Seim 244
Kl. 2 Andre Johannesen, Bergen 345