Mestermøte på Bar2Be
Dei drar fulle hus kvar for seg. Korleis skal det gå når Emergenza-finalist KingCalling og rutinerte Eggstock-vinnar Major Parkinson speler i Os på same kveld?
Major Parkinson, som blei stifta i 2003 og vann Eggstock-festivalen same år, kjem tilbake til Os etter suksessen på Søfteland som siste band i teltet under Søfteland Rock N Lol laurdagen.
– Søfteland Rock N LoL blei knallbra, men sidan bandet før oss for forseinka fekk vi litt kort tid på scenen før Ida Maria skulle på, seier Major-trommis Jens Erik Aasmundseth.
Bandet held på å spela inn sitt tredje album, som skal sleppast i mars 2013. Bandet har gjort suksess med satsinga si i Tyskland dei siste åra, og har blant anna spelt på Fusion Festival, som er Europas største festival for alternativ rock.
Eksklusiv konsert
– Vi skal tilbake til Tyskland til sommaren, så konserten på Bar2Be i Os blir ein av berre 8 konsertar i Noreg før vi grev oss ned for å gjera ferdig plata. Då kjem ikkje ut i dagslys igjen før den er ferdig, lover Aasmundseth.
– Og vi gler oss veldig til å spela med KingCalling. Fleire av dei er gode kompisar av meg, og representerer på mange måter det yrande musikklivet som finnest i rockemiljøet i Os.
Tok 'an heilt ut i Haugesund
KingCalling, som kom på tredjeplass i bergensfinalen i Emergenza i haust, har både fått ny bassist og hatt ein vellukka tur til Haugesund.
Bassist Leif Herland har nyleg gått frå bandet for å bruka tid på andre ting, han har blitt erstatta av den erfarne bassisten Olav Skorpen, også han frå Os.
Les òg: Meiner alvor
- Vi hadde to vellukka konsertar i helga, ein på Garage i Bergen og ein då vi varma opp Pagan's Mind på Byscenen i Haugesund.
– Vi fekk veldig smigrande tilbakemeldingar frå musikarmiljøet i Haugesund, så det blei ein veldig kjekk tur, seier trommis Giuliano LoMonaco.
I studio
KingCalling består i tillegg av Morten Torkildsen (gitar), Espen Austestad (gitar) og Eirik Søfteland (vokal).
– Vi held på å spela inn debut-EP-en vår og har ein del konsertplanar framover, så konserten fredag blir nok den siste i Os på ei god stund, trur Giuliano.
– Og den gler vi oss veldig til, dette blir ein knallstart på påsken! lover han.
KingCalling og Major Parkinson ser du på Bar2Be førstekomande fredag.