Meldte om innbrot - blir ikkje trudd
Ein mann som måndag meldte om innbrot i bustaden sin er sjølv mistenkt for å konstruera situasjonen og å forklara seg falskt.
Det har vore uvanleg mange innbrot i Os den siste tida, og måndag fekk politiet melding om nok eit innbrot.
– Denne gong rykte vi ut til eit bustadområde nord for Os sentrum, fortel politioverbetjent Audun Hadler-Olsen.
Meldar sa at nokon hadde brote seg inn ei terrassedør og stole nokre smykke.
Men då politiet skulle undersøkja åstaden ante dei ugler i mosen.
Blir meldt for falsk forklaring
– Vi fekk ikkje huseigar si forklaring til å stemma med det vi fann på staden.
– Basert på undersøkingar, og nokre andre opplysingar, så mistenker vi at han har gjeve falsk forklaring.
Mistenkte, ein mann i 50-åra, skal inn i fleire avhøyr. Å gje urett forklaring kan straffast med alt frå bøter til to år fengsel.