Meir komikk på Catten

Frå 2011 til 2014 arrangerte osingen og standupkomikaren Jon Hægland fleire show og klubbkveldar på nattklubben Catten i Os.

Laurdag 26. mars er han tilbake på scenen, som konferansier, for å leia fire komikerkollegaer gjennom ein tøff kveld.

– Comedy fight club er eit bergenskonsept. Det er ikkje som battle, der det er om å gjera å ta motstandaren, men det er konkurranse om publikum sin respons, fortel Hægland.

– Er dette berre krampeaktig, eller plar det bli morosamt?

– I første omgang får kvar komikar fem minutt. Då bruker dei naturlegvis sitt beste materiale, for det er mengda latter og applaus dei blir rangert etter.

I andre omgang er det verre. Før dei går til pause trekk dei fire komikarane kvar sine tema som dei må skriva tekst til i pausen. Publikum får penn og papir før dei set seg og blir oppmoda om å skriva tema, generelt og aktuelt.

– Den som vinn førsteomgangen er sist på scenen i andre omgang, og får best tid på seg, cirka dobbelt så lang tid som førstemann. Det kan vera ein fordel.

– Andre omgang blir ofte også vittig, publikum er varme og spente og har lågare forventingar når dei veit kor kort tid komikarane har hatt på seg.

Komikarane

Dei fire aktuelle komikarane denne påsken er Ole Markhus, Jonis Josef, Runar Bønes og Adam T.

– Ole er naturleg vittig. Han er ganske fersk på standupscenen i Bergen og har radioprogrammet Mensaklubben på studentradioen. Jonis er up & coming og har vore fast på scenen på Latter i Oslo.

– Runar er ein erfaren kar frå Bergen, som i det daglege driv Bønes Gårdsmat, Adam starta i Bergen, men flytta til Oslo og har tatt det vidare på scenane i hovudstaden.

Sjølv har Jon, som no er trebarnsfar, òg halde komikarkarriera ved like.

– Det blir ikkje like ofte som før, men eg føler eg har utvikla meg bra. Eg har òg fått stått på scenen på Latter.

– Men laurdag har eg ei mindre rolle, då er det til å presentera komikarane, som tar ein kort «rost» før dei får kvar sine første fem minutt, seier Hægland, som gler seg til å ta standup til Os igjen.