Med lågbudsjett i eliten

Skal ein samanlikna prestasjonen til herrelaget til Bjørnefjorden Golfklubb, når dei til helga speler i eliteserien i NM med fotball, blir det omtrent som om A-laget til Os Turn med sine ressursar skulle spele mot Rosenborg.

– Vi har eit sportsleg budsjett i klubben på 50 000 kroner. Stavanger, som er eitt av laga vi konkurrerer mot, har til samanlikning eit budsjett på om lag éin million kroner.

– Det vi ikkje har i pengar tar vi igjen i eit fantastisk miljø, seier pro (trenar) Sverre Marcelius frå Bjørnefjorden Golfklubb.

Stavanger hadde fire av seks spelarar på det norske laget i EM nyleg, og er favorittar i turneringa.

Går for ny besteplassering

Laget frå Bjørnefjorden spelte seg i fjor opp igjen i eliteserien etter at dei året før rykte ned til første divisjon.

– Året før der kom vi på 9. plass, då vi spelte i Drøbak.

– Målet for helga må vera å setja ny klubbrekord i høve plassering, og då kan alt skje, smiler Marcelius.

På Noregs beste bane

Turneringa går på Oslo Golfklubb sin bane på Bogstad. Ein bane som ifølgje Marcelius er Noregs beste bane.

– Det er for eksempel heimebanen til Tutta (Suzann Pettersen, journ.mrk). Når ho inviterer dei beste golfdamene i verda til si eiga turnering, så er det nettopp på Bogstad dei speler.

– Banen blei i 2010/11 rusta opp for 60 millionar kroner.

– Banen er vakker, men har ein del utfordrande og vanskeleg hol, forklarar golf-proen.

Frå Spania til Oslo

Øystein Engevik, Magnus Engevik, Anders Engelsen, Alexander Heggland og Sverre Marcelius utgjer laget frå Bjørnefjorden. I tillegg har dei med seg Gjermund Engelsen som lagleiar.

– Vi har ikkje trent så mykje saman, men vi er eit jamt lag som møtast i Oslo for innspel i dag.

– Øystein har ikkje spelt så mykje sidan han gav seg som proff, så han og Magnus kjem rett frå treningsleir i Spania til Bogstad. Eg reknar med at dei har fått nokre gode økter der nede.

– Aleksander og Anders veit eg har formen inne, så då gjenstår det berre å sjå korleis formen er til “gamlefar”, ler Marcelius når han omtalar seg sjølv.

Eit maratonløp

Dei fem skal spela to og to saman fredag og laurdag over 36 hol. I tillegg skal dei gå individuelle startar, men kor resultata teljer for laget over 18 hol på sundag.

– Det blir eit maraton.

– Sidan vi berre er fire som skal spele dei to første dagane, så får vi sjå det litt an på kven som byrjar. Om ein av oss føler at han ikkje har dagen, så står gjerne denne over første runden, men det skal bli nok spel på alle likevel, smiler golfaren før han set seg i bilen på veg over fjellet.

Damelaget til Bjørnefjorden skal også ut i lag-NM i helga. Dei speler i 1. divisjon og skal gå på Østmarka golfbane rett utanfor Oslo.