MC krasja med hjort
– Han tok trippelsalto før han landa, eg var sikker på at det hadde gått skikkeleg gale, fortel vitne Kjell Engelsen Moberg.
Onsdag i 20.30-tida var det ei trafikkulykke på E39 Byvegen på Kalandseid.
– Vi hadde begge retning Bergen då ulykka skjedde, fortel Kjell Engelsen Moberg, som køyrde rett bak MC-en.
Brått såg han at både motorsykkelen og førar blei slengt i lufta.
– Han tok sikkert tre saltoar før han landa. Hjorten, som kom ut i vegen rett framfor MC-en, såg eg ikkje før han reiste seg og stakk ut på jordet.
– Eg frykta at det var ein død mann eg gjekk bort til, og blei naturlegvis letta då eg såg at han rørte på seg.
Åtvarar MC-førarar
Førar, som av vitnet blir skildra som ein mann på rundt 40-50 år, sette seg opp og spurde korleis det hadde gått med motorsykkelen hans.
– Heldigvis var det helsepersonell i ein av dei andre bilane som kom tidleg til staden. Dei tok hand om han fram til ambulansen kom.
– Ulykka skjedde rett etter at vi hadde kome ned på flaten og forbi ungdomshuset, nær busshaldeplassen. Eg har ikkje sett at hjort har hoppa ut i vegen i dagslys, seier Kjell, som vil åtvara andre trafikantar om risikoen for samanstøyt.
Midtsiden lykkast ikkje i å nå politet per telefon onsdag kveld.