Mats tok sats

Onsdag signerte Mats Cato Moldskred kontrakt med moderklubben Os, etter 6 år i Adeccoligaen og svenske Superettan.

I gårsdagens treningskamp, som gjekk borte mot Fyllingsdalen, sette han inn 2 av Os sine 3 mål.

Fyllingsdalen – Os: 3-3 (0-1)
Målskårarar, Os: Emilis Zilinskas og Mats Cato Moldskred 2

Fyllingsdalen, som er slått saman av Fyllingen og Mats Cato sin gamleklubb Løv-Ham, slo blant andre Åsane to gongar då dei i fjor landa på 4. plass i 2. divisjon.

I går var det Os som styrte kampen.

– Det var masse positivt å sjå. Vi fekk til mykje av det vi øver på på trening og skapte mange sjansar. Fyllingsdalen sine sjansar kom stort sett då vi gjorde feil, seier Os-trenar Jørn Vegard Berge.

– Men vi har framleis ting å jobba med. Vi skal halda fram med å utvikla oss på dette med timing av press, og vi skal henga endå betre saman i lagledda.

To mål på corner

Os leia 1-0, 2-1 og 3-2, men vertane utlikna 8 minutt før slutt.

1-0 kom då tidlegare Søre Neset-spelar Emilis Zilinskas heada inn ein corner.

2-1 kom på retur frå tverrliggarskot av Egil Thuen og 3-2 blei sett inn på same vis som 1-0, men denne gong var det tomålsskårar Mats Cato sitt hovud som styrte ballen i nota.

Brukte 16 spelarar

Stian Lunde (opptatt) og slovakaren Andrej Nemec (lettare kneskade) var blant spelarane Os måtte klara seg utan i går. Også Stian Bakke og Glenn Krossøy måtte stå over.

Fyllingsdalen skal ifølgje Berge ha stilt sterkt.

– I tillegg til å ha eit god A-lag blei Fyllingsdalen noregsmeister med juniorlaget sitt i fjor.

Berge brukte 16 spelarar i gårsdagens treningskamp, alle fekk minst éin omgang.

Os sitt lag (4-3-3): Frode Øvdredal - Hadi Amiri, Lukasz Horvath (Dani Bergstø), Emilis Zilinskas (Børge Borgen), Torkel Hjertnes - Erik Kanestrøm, Mats Lepsøe, Ørjan Glesnes (Håkon Kvittingen) - Mats Cato Moldskred, Christer Olsen (Egil Thuen), Roar Vestbø (Patrick Bujna).

Os speler neste treningskamp heime mot Bjarg førstkomande torsdag kveld. Då skal ein del andre spelarar på banen.